中國球星「老孫」孫繼海，喺英國球壇磨練10年，得道變成馬騮精後，周二英冠替錫菲聯上陣1:1和高雲地利時，出無影腳拍「蚊」遭反咬，結果食紅牌離場成笑柄。
火遮眼踢米蘇特被逐
呢隻「毒蚊」係高雲地利嘅馬耳他前鋒米蘇特，雖然身高得1米65，但上屆英聯盃兩度針破曼聯大門，令「蚊子」威名不脛而走。周二，老孫喺蚊子下半場上陣後立立亂，46分鐘禁區內將對方「揩跌」，結果球證判罰12碼，搞到球迷同老孫好火滾，好彩對手艾利洛禾特射失。
火遮眼嘅老孫恨不得一腳踩死「毒蚊」，5分鐘後對方背住攞波，於是老孫即刻衝前起雙腳踩落對方隻腳，「毒蚊」中招後典來典去。球證廸曼即時出示紅牌罰老孫離場（小圖），老孫大受刺激下，走到角球旗突然發功，大力扯旗洩憤，之後猛唸鬼佬F字頭嘅咒語，仲走入場搵球證理論。
大陸網民責丟中國人架
呢個老孫道行的確夠高，途中突然起右腳踢向上空，隨即飛出一道「白光」，全場球迷「嘩！」一聲，幾秒後「白光」喺30碼外落地，睇真啲，原來係老孫腳上嘅白色「一剔」牌波砵。呢吓出腳十足十黃飛鴻嘅佛山無影腳，難怪在場球迷見到助教攬實老孫出場時，都紛紛報以熱烈掌聲。
最後呢場波各一言和，中、英傳媒喺歐聯比賽日下，仍有唔少篇幅報道老孫拍蚊單嘢。錫菲聯領隊布力維爾賽後以「垃圾」形容全隊包括老孫嘅行為，大陸網民亦笑老孫丟中國人架，更有錫菲聯球迷恥笑球隊點會簽「積犯」老孫返來（喺英國攞過5面紅牌）！
睇嚟經過老孫呢次事件後，外國人聽到中國個名，都會好似聽到三鹿奶粉咁，走夾唔唞啦！