九月十二日晚，左丁山變成日本首相左騰右騰。披圖梁請客，馬會舉行「冠軍人馬之夜」，兩度都要去，如何是好？好彩咁啱，兩個宴會都在金鐘香格里拉酒店舉行，馬會在宴會廳，披圖在三十九樓，左丁山可以聲音兩邊走。於是先去宴會廳參加酒會，到咗七點，坐𨋢上三十九樓賀披圖與梁國雄醫學博士創辦嘅「正本會」開業十二周年紀念。上到去，披圖正與佢嘅英皇書院校友影相，披圖叫左丁山影埋一份，勉強拉埋一啲「英皇」關係啦，事關左丁山先父在英皇讀到初中畢業也。
財經報紙老闆F係披圖之英皇同學，影完相就趕住去另一個約會。老闆F捉住左丁山問泰國狀況，於是一路行一路講。八點鐘馬會宴會開席，原來有兩項表演，頭盤係一位八歲小妹妹表演鋼琴獨奏，呢位小妹妹係校際音樂比賽鋼琴冠軍，每日練琴五小時，既有天才又勤力，閒時鍾意騎馬，馬會好啱聽。主菜就係小提琴名家姚珏獨奏，以前人人話佢係魯平新抱，魯恭太太，現在人人都改話魯恭係姚珏嘅老公。姚女士之小提琴，非同凡響，三百年前產品，世間罕有，據講時價二千萬港元，馬會特別加派保安員睇實。
聽完姚女士表演，已近十點，食完牛肉，立即上番三十九樓，披圖宴會正在吃到阿拉斯加比目魚，唔算太遲，坐在陶傑旁邊，更可乘機向才子討教。坐低冇耐，客人阿B哥致送紀念品畀主人家，係一個橫匾，上書「正本仁心」，披圖請陶傑評述幾句，才子果然醒目過人，一企起身就話：「唔睇下款，我以為係本港書法大家手筆㖭，筆走龍蛇，氣勢奪人，竟然係阿B哥真蹟，而且『正本仁心』四個字，由右至左，格局正宗，真真正正有文化。」陶傑表演完，輪到近年勤練書法嘅阿B哥彈結他唱歌，由《SealedwithaKiss》至到溫拿名曲，何止寶刀未老，簡直係向今天歌壇新秀示範表演！披圖當年係溫拿樂隊經理人，與阿B十分老友，請到阿B作餘興表演，合情合理，想唔到係B哥keep得咁fit，仍然可以做得電影男主角，唔怪得佢自己話可以做「正本會」健康產品代言人也！