黎明（Leon）、衞蘭和光良將於11月舉行的慈善演唱會，被指門票滯銷，銷量不及姊妹公司東亞唱片的王菀之的兩場騷。Leon昨日透露收到風，直指是同系的東亞唱片有人放料，感到不悅，更說：「自己左手打右手，右手會唔痛咩？」
黎明昨日出席在鑽石山舉行的「公益金四十周年八達通卡」記者會，他還義賣印有其肖像的限量版八達通。為了公益金四十周年，Leon、衞蘭和光良將於11月在九龍灣StarHall舉行三場慈善演唱會，昨日有報道指門票滯銷，而王菀之於9月26、27日同一場地舉行的演唱會，門票卻差不多售清。
「做嘅人要反省」
Leon被問及此事，他早有準備說：「我有啲唔開心，唔係為單新聞，係有訊息傳咗畀我，話係東亞唱片放嘅鱔料，我係AMusic，我哋三個藝人都冇錢袋落袋，如果善款因為新聞而受到影響，夾料嘅人係咪好開心呢？兩間都係林生（林建岳）嘅公司，自己左手打右手，右手會唔痛咩？如果傳聞屬實，做嘅人就要反省，冇嘅話就當我冇講過，有做過就心知肚明。」
問Leon會否知會林建岳？他說：「冇需要，我冇乜嬲，公司有咁多人，會揀唔同嘅方法宣傳，但咁做（宣傳）會損害公司資產，我只會管好自己同事。」
Leon形容此事有如在學校被人篤背脊，問他是否得罪人？他說：「我唔會得罪人，不過啲新聞唔係寫到極差，點會有銷量。」
Leon表示毫不擔心銷情，他說：「從來都唔做擔心嘅事，𠵱家只係賣咗幾日飛，我哋唔係奧運金牌選手，三個鐘就賣完，其實個記者可以等多兩個星期，咁呢篇新聞可信性會高啲。」
東亞稱少溝通
對於Leon坦言東亞有人放料給傳媒，記者昨日致電問到東亞集團董事陳志光，他說：「冇聽過喎，我唔會問番Leon，因為佢嘅公司係好獨立，通常直接同老闆溝通，我哋好少溝通。」
此外，有傳李嘉欣好事近，將於12月與許晉亨結婚，Leon說：「如果係就唔只恭喜佢，仲要同佢哋飲酒慶祝啦。」
採訪：胡比
攝影：林德雄
娛樂資料庫：岳少旗下三國鼎立
林建岳旗下有多間娛樂公司涉及電影、音樂、演唱會及藝人經理人等業務，唱片公司也有三間，包括東亞唱片集團有限公司、與黎明合資的AMusic唱片公司，以及他打本給陳冠希開設的CMD。
《東亞唱片》
劉德華、鄭秀文、任賢齊、何韻詩、許志安、劉浩龍、王菀之、林一峰、at17、藍奕邦、方皓玟、黃鎧晴
《AMusic》
黎明、楊千嬅、衞蘭、衞詩、光良、應昌佑
《CMD（ClotMediaDivision）》
陳冠希、農夫、DJTommy
資料來源：《蘋果》資料室
