美國有百年歷史的投資銀行雷曼兄弟破產觸發的金融海嘯，繼續推低港股，昨日恒指更下跌663點，跌穿18000點水平，收市報17637點。明星、名人的身家、投資都應市大縮水，Jo飽夏雨過百萬投資，雖然以中移動、和黃等實力股為主，但已不見三成錢；專買細價股的黎耀祥，更蝕掉一半資金；名媛榮雪梅賬面損手4,000萬，索性去旅行費事睇，周美鳳更指有友人認為恒指會跌到8000點水位才見底，大家小心！
撰文：丁寧
夏雨：仲揸住中移
損手股--中國移動（941）
「我都有花7位數字投資買股票，我有時會趁高放趁低買，不過個巿咁落去真係跌到叫救命，我都唔見咗百分之三十。𠵱家手頭仲揸住一啲和黃（013）、長實（001）同中國移動（941），有啲藍籌揸手又有息收吓，好過放喺銀行嘅。」
榮雪梅：蝕$4,000萬
損手股--中國移動（941）、中國人壽（2628）
「我手揸兩隻愛股中移動（941）、中國人壽（2628）加埋其他股票，賬面唔見4、5千萬，但喺一班朋友中，已經係蝕得最少嘅一個，我有啲朋友都係唔見幾千萬，不過係美金。我好穩陣，唔會買輪，全部都係買實力股，係長線嘅，我冇乜所謂，以前都有賺過，個市唔升就跌，實力股係可以返番嚟，咪由得佢放喺度囉。𠵱家越睇個人就越大壓力，最好乜都唔好做，睇都唔睇，出去開心吓，我下星期都同老公去日本、歐洲旅行，行吓，今年都唔使睇個市。」
黎耀祥：信內幕綁死
損手股--中航科工（2357）
「見到股巿係咁跌，我都好肉痛，最衰自己當初唔聽相士講，佢勸我唔好投機，我又唔信邪，聽到朋友有內幕貼士，自己又心郁郁買咗中航科工（2357），諗住佢賣內地零件都可靠，點知一路綁死，投資6位數字唔見成半，我希望一上番就即走。」
周美鳳：恒指見8000點
損手股--招商銀行（3968）、中國人壽（2628）
「𠵱家香港進入經濟衰弱期，上個月仲有人同我講，話睇8000點（恒指），你話驚唔驚？我今年開始慢慢走，招行（3968）都走晒，中人壽（2628）有啲27蚊，有啲30蚊，都入得唔係好貴，其他就賬面唔見一半，𠵱家揸住現金同實力股，我反而想等樓市再回啲買寫字樓。」
曹永廉：唔敢再入市
損手股--中國移動（941）、弘海（8112）
「我兩年前經朋友介紹，買咗隻二、三線嘅弘海（8112），不過一路都坐艇，唯有長揸住先，我又入咗啲實力股中國移動（941），但面對波動股巿，乜都受影響，我投資咗6位數字，𠵱家都蝕咗好多，諗住賺快錢，點知冇運行。𠵱家個巿咁，我又唔捨得放，亦唔敢再入巿。」
孫耀威：執到幾千蚊
「好似神推鬼撞咁3個月前突然放晒啲股票，都可以平手走，仲賺到幾千蚊，𠵱家可以考慮趁低吸納。妹妹曾經喺雷曼兄弟公司做投資顧問，但好彩佢早排已經冇做，所以影響唔到。」
張堅庭：咪趁低吸納
「我最鍾意買H股同地產股，就係因為買咗呢啲股，遇啱呢次恒指大跌，我都有唔見錢，大概唔見咗一成左右，可能吸取過早年股災經驗，我已經盡量小心，成日提人千祈咪趁低吸納，特別係藝人，恃住識得多人，聽聽埋埋啲所謂貼士，於是一直期待高位先放，蝕緊又攬住唔肯斬，就會越輸越多。」
