雷曼申請破產保護，令全球股市爆發股災，昨日已見有恐慌拋售味道，由於金融危機在前，心急入市撈底仍是高危動作。買股票要輸，但更唔抵應該係一眾買咗雷曼所發行窩輪之散戶投資者，Call輪固之然無得止蝕，連Put輪都無得賺，就認真無辜。
雷曼之後，輪到AIG面臨破產保護，假如AIG都出事，後果認真不敢想像。唔知係咪受到呢間全球保險集團有機會出事拖累，噚日幾隻保險股股價都重挫，平保（2318）股價跌近一成，中財險（2328）更勁跌兩成，連好少出現急跌嘅宏利金融（945）都跌7.8%。
未屆博反彈時機
財險之所以勁跌，原因之一係AIG原來是財險策略股東之一，持股近一成，並有5年禁售期，財險在03年11月上市，即係要到今年11月至解禁，但AIG捱唔捱得到11月，頗成疑問。
一間咁龐大嘅金融機構，AIG假如要申請破產保護，好多人會受到牽連，喺事件未明朗化之前，即使好多股份已經甚為吸引，切勿輕言入市撈底。
其實昨日不少暴跌股都是以往較為硬淨的實力股，例如中海發展（1138），在其他航運股紛紛下跌時，相對跌幅仍然唔大，但係昨日似乎要追回跌幅，單日暴跌15.5%。
中海發展業務以亁散貨為主，有別於集裝箱業務較受貿易經濟周期影響，但在近期基本資源大跌價之後，亁散貨運費隨時「急起直追」，所以即使有高息及低PE支持，股價都難免一跌。想博呢隻昔日之硬淨股，還是待AIG事件明朗化之後才博。
歐陽風