日對夜對同一樣嘢，唔易，除非，你真係好鍾意，尤其係車，更甚。我鍾意KiaMorningEX1.15-Drs嗰種四四方方，少少笨但又笨得好可愛；更鍾意佢慳油見使，十皮唔使買到架私家車招搖過市，啱晒精打細算又鍾意揸車嘅女人仔。
記者：梁美甜
攝影：陳陶鈞
模特兒：Sandy（StageModels）
呢個世界乜都係S加兩戙，唔好信曾俊華講嘢呀，通脹有排未見頂呀，家陣一個杯麵差唔多收你一個金銀膶，一罐豆豉鯪魚Costyou十幾蚊，打工仔要買車養車確實唔係易事。聽朋友仔講韓國KiaMorning抵玩，車價十萬有找，所以諗都唔諗，即問代理借部KiaMorning過吓揸車癮。由於今次代理未有新一代出咗牌嘅Morning，所以借上一代車款作長期測試，兩代車搭配嘅引擎波箱一樣，只係外形線條有分別，測試嘅車偏向是方正硬朗，新一代則較圓潤大眼，或者潮流興大眼仔啦。
大熱天時，上車即開冷氣，嘩，好快有冷風，拍得住歐日車，元朗攞車未上屯門公路，隻手已經Feel到凍，部冷氣都幾勁。起步，四、五十公里都行成三、四千轉數，相信幾食油；上屯門公路，Keep住時速約八、九十公里行，轉數維持二千零轉，算係咁，跑到上百公里雖然感到車身有少少飄，但依然畀到信心Keep住行，唔會覺得有氣無力，要挑剔係車廂路噪強，唔開音響有排嘈，以十萬唔使兼1.1公升細車而言，表現算係咁。
好一部買餸車
撞啱今晚齊人食飯，順便去荃灣街市走一轉，由屯門公路至荃灣楊屋道街市，一路拜車身細扭力好所賜，切線Cut車，穿梭人多車多路段靈巧如蛇。揸車入過任何街市範圍嘅朋友都知道，街市周圍唔係人就係一籮二籮，又或者N咁多手推車單擋阻路，搵個闊啲嘅位都超難，若然遇着幾個阿蟬眼又矇耳又聾仲弊，成串車龍狂響都無法，勢必要龜行。呢個時候，KiaMorning就大派用場，小巧的骰行走呢啲場面最啱，簡簡單單就攝到車位泊車，其他車真係唔羨慕得咁多，最盞係買完一大堆餸之後，車身內櫳夠闊落，收起後排容積仲誇，買足幾圍餸菜都擺得落。
慳油每公里$1
開住冷氣行咗兩日，油錶狂跌，莫非部車俾冷氣扯得盡過龍？唔忿氣，誓要試真啲，兜入油站打爆缸油，開住冷氣繼續遊車河，上山下海港九新界兜到勻，直至着燈足足行咗360公里，每公里大約$1.2；試埋唔開冷氣行車，起步，開車，見轉數浮游於2,500左右即刻熄冷氣，見轉數錶慢慢跌，之後維持千零二千數，再試走一段長程，由荃灣跑入大棠再返入將軍澳，咦，油錶未跌過，又係犀利喎！不過唔開冷氣嘅代價係濕到滴出水，我汗如雨下，天氣太熱嘞，自問係怕熱一族，真係頂唔住，打工啫，無謂難為自己，開番冷氣一身爽晒，最多行慢啲，定住時速六、七十公里行車。
大部份時間熄住冷氣兼以定速行車，哈，第二缸油真係襟行得多，油錶分成六格，行到330公里剩番成格油有多，可見Morning幾慳油見使，要行每公里$1，唔難。
KiaMorningEX1.15-Drs規格
引擎：1,086cc直四SOHC
馬力：65ps/5,500rpm
扭力：97Nm/2,800rpm
傳動：四前速自動波
車價：新車
由$87,993起
查詢：KiaMotors（28932326）
