之前李超人話住咗幾十年嘅深水灣道79號風水大宅，因為屋企人越嚟越多，所以要重新起間大啲。超人差唔多兩年前已經攞咗重建間屋嘅建築圖則，因為佢要多起一層，兼想要大啲樓面，但塊地張地契限咗只可以起三層，所以佢就要向政府申請改契兼科水喇。
本嚟只係幾千萬嘅數，超人唔覺意打個乞嚏都冇咗啦，但估唔到搞咗成年幾，最近先至畀咗錢，要5413萬。
睇番呢幢大宅，超人喺63年以65萬銀買入，住咗40幾年，舊有嘅3層樓面大約6000呎。𠵱家就可以連車房起到4層高，樓面亦增至8850呎，每呎樓面補價都要成萬九蚊，唔怪得一向慳家見稱嘅李超人，要同政府傾咁耐補價啦。
新世界（017）早兩月亦同政府搞掂咗幾個項目嘅補價，貢獻超過67億銀畀政府，涉及項目包括元朗龍田村、尖沙嘴新世界中心同馬鐵車公廟上蓋發展等。