中秋過後，葉太請鄰居王婆食月餅。
「新聞話喎，環保團體做咗調查，話平均每個家庭，今年會掉最少一個月餅。」「咁啱，今年我老公拎咗好多月餅返嚟。有傳統有潮州有冰皮有雪糕，全部人哋送㗎。王婆你唔使客氣呀，食多啲啦！」
「葉太你真係好人『暑』，我知，啲環保人士仲好似話建議立法管制月餅包裝...」王婆未講完，葉太已經忍不住搭嘴：「早就要管啦！頭先呀，我喺垃圾站見到啲月餅盒堆到成座山咁高呀，真係睇見就眼寃！」
強制唔准鐵盒包裝
「哼，計我話，政府早應該立法，強制月餅商唔准用鐵盒包裝，等我睇吓個衰仔仲可以攞咩去煲蠟！」葉太講得性起。
「月餅盒又唔係完全無用嘅，我有唔少老友都會用嚟裝吓嘢。」王婆邊吃邊說。
「王婆，你唔明㗎喇，查實啲月餅盒好唔環保㗎！」「唔止呀，近九成人仲話，戶外賞月時，佢哋選擇即用即棄餐具，主要是紙碟、紙杯同膠叉，由此推算，呢個中秋可能消耗咗超過560萬件即棄餐具呀！」
「唓...咁你平時又拎咁多膠袋？」王婆忍不住搶白。
「唉...膠袋可以裝嘢吖嘛。之但係月餅盒係無用嘅包裝物料喎，係咪先？」
「阿媽妳成日買個啲新衫夠係包裝物料啦，咪一樣咁唔環保，哈哈哈哈！」小葉煲完蠟返到屋企。
大時大節環保贈興
「玩到咁夜至返，你個衰仔係咪想死呀？」葉太扯開話題罵道。
「食件月餅啦小葉。」王婆馬上說。
「衰仔，你阿媽支持環保，都係為咗你呢個下一代咋，枉你仲駁嘴駁舌！」葉太繼續囉嗦。
王婆心想：「係啦，我啲阿婆，無人無物，無下一代，你哋啲人成日同我講環保，仲要揀正大時大節嚟講，又唔識得崩口人忌崩口碗，係咪專登刺激我吖？」
想到這裏，王婆百感交集，月餅再難下嚥。她動身就走，臨走說：「我都係唔食喇，其實頭先我未講完，𠵱家環保團體建議立法管制月餅包裝...廢物的處理方法啫，不過遲吓會唔會連食月餅都管埋就好難講喇。」
尹思哲
http://wanszezit.wordpress.com/
電郵：mailto:[email protected]