中秋本應慶團圓，不過今年中秋，好多人攬住一叠變成牆紙嘅股票，一啲都冇慶團圓嘅歡樂。散戶QZPMG喺《香港討論區》呻：「日又跌，夜又跌，唔再係家好月圓慶中秋，而係月光光心慌慌。」
冇心情迎中秋嘅唔只佢一個，may30都係「黑口黑面迎中秋」。不過，QZPMG最慘係買咗成手內房股，偏偏越窮越見鬼，下個月等錢用，家陣頭痛緊唔知啲股放好定唔放好，佢話：「舉頭望明月，而是地產傷。」
慘過97負資產
ngaiyin1977見呢位散戶咁嘅情況，形容佢「仲慘過97負資產人士」。唔少網友好似winwin9021咁，勸佢「全止蝕」，但xy1xy2就覺得可以「等下一個大牛市」。其實沽唔沽嘅關鍵可能係等唔等錢用，正如lamfun咁講：「唔等錢用嘅話，幾低都唔沽，睇你都唔捨得啦。」