陳文媛（BoBo）自從被指涉及陳冠希淫照事件後，一直沒有露面，昨日馬季開鑼，BoBo的金融界男友金紫耀單拖現身馬場。原定上月與BoBo結婚的他，昨日表示至今仍未結婚，關係如常很好，但婚事要循序漸進，慢慢來，看來兩人的戀情存在不少變數。
陳冠希淫照事件發生了大半年，涉及風波的藝人最近都陸續現身，重返正軌生活。陳冠希月初在紐約和潮人KAWS睇騷，繼續夜蒲攬女，鍾欣桐（阿嬌）兜兜轉轉，終在中秋節Twins團圓；張栢芝則避世湊仔多時，近期也盛傳復出拍電影。
事件中一直沒露面的陳文媛，其男友金紫耀都絕迹社交圈多月。昨日馬季開鑼日，金紫耀單拖現身馬場，捧友人莊友堅的愛駒「威利多多」場。
「你哋慢慢跟進啦」
問金紫耀和BoBo的婚事，他說：「遲啲先。」問他現時與女友的關係如何，他即耍太極說：「你話呢，今日好熱呀呵？」問他何時結婚？為何不見BoBo時，他繼續避談說：「今日我係嚟睇跑馬呀。」問他可是與BoBo分了手？他語帶玄妙說：「慢慢睇啦！」
記者之後再致電金紫耀，他表示與BoBo仍未結婚，關係仍然好好，至於結婚打算，他則說：「你哋慢慢跟進啦，會循序漸進咁發展。」
蔡加敏斥無良商人
此外，「玩具大王」蔡志明女兒蔡加敏昨日也有現身馬場，對於近期內地三鹿牌奶粉引致1,200多名嬰兒腎結石入院，她透露囡囡Chelsi飲用日本奶粉，她說：「200幾蚊罐，長期定咗10幾罐喺屋企，因為日本奶粉監控得好啲，比較穩陣，成份對BB腦部發展好啲，佢𠵱家三個月，都成18磅，抱到我腰都痛。」
蔡加敏指摘內地的無良商人離譜，她說：「做人父母見到BB咁，都覺得好凄凉，BB嘅身體係影響將來成世人，件事好陰功。」
採訪：LawWaiMan
攝影：RickyIp