溏心風暴之家好月圓鬥戲人辦 第十七回
結局倒數仲有5日--在《溏心風暴之家好月圓》中，由溫家恆飾演的中仔，因讀書不成被取笑為半文盲，但現實中於英國土生土長的他品學兼優，原本擔任無綫《東張西望》主持，在一次偶然的機會之下被監製賞識，有份成為《溏心》一員，溫家恆表示感覺猶如發夢。 撰文：王崇穎
溫家恆於無綫劇集《溏心風暴之家好月圓》中擔演幼子中仔，他的面孔雖然對於觀眾來說較為陌生，但因外形討好，劇中的角色依然令人留下深刻印象，原來這位新人正式拍劇之前，曾擔任《東張西望》主持，因一次偶然機會被監製劉家豪賞識，便順利進入劇組拍劇，他說：「之前因為喺《東張西望》做主持，咁啱嗰次訪問馮寶寶，訪問之後大家傾開偈，原來大家都喺英國生活過，之後公司又叫我幫佢做個專訪，點知嗰段訪問俾家豪哥睇到，佢就同我講話呢個劇有個角色好啱我，問我有冇興趣演，我有呢個咁好嘅機會，真係好多謝寶寶姐同家豪哥。」
李司棋教演戲
劇中溫家恆飾演從英國返港的留學生，但因無心向學讀書不成，更因一次為公公（周驄飾）繙譯一封英文信件，偷偷用繙譯機而被Sa姨（關菊英飾）發現，因而被恥笑為半文盲，雖然現實中的他同樣英國留學，但不同的是溫家恆本身品學兼優，他說：「我梗係唔係文盲喇！我喺英國出世，喺英國讀小、中、大學，主修經濟同數學，04年返香港就去咗打銀行工。」
雖然首次拍劇，但溫家恆表示劇中每位演員對他十分關照，他說：「初初真係好唔慣，因為劇中每一位演員都好有經驗，而我唔識睇中文劇本，所以一開始都好有壓力，不過佢哋對我真係好好，不時會提點同教我，令我好快習慣拍劇嘅模式，陳豪仲不時會同我傾偈，提點我點樣去做戲，同喺呢個圈點同人相處，令到我學識好多嘢，荷媽（李司棋飾）都對我好好，會教我點去演好呢場戲，令觀眾睇落去會舒服啲。」
性格同樣怕醜
溫家恆自言拍攝期間也試過不少NG，幸好均獲得眾人體諒，他說：「NG一定會有，不過自己都會盡量減少，唔想因為自己而阻礙拍攝，佢哋個個演員都好諒解我，有機會拍到呢套劇真係好開心。」自少於英國經常租看無綫劇集，是次有機會參與演出令他恍如做夢，溫家恆說：「起初我簡直覺得發夢多過真，特別係荷媽同陳豪，真係冇諗過有機會同佢哋合作，仲可以做一家人，有咁多對手戲，嗰種感覺真係好得意。」
劇中的中仔性格比較文靜怕醜，溫家恆說：「其實同我本身嘅性格都有啲似，不過如果熟絡咗，我會比較多嘢講。」自從拍劇後溫家恆終於深深感受到劇集的威力，他說：「𠵱家喺街上好多人都會叫我中仔，初初聽到都會覺得有少少愕然，不過見到啲小朋友叫我，我真係會好開心。」
搶先爆：阿卡突心臟病發
今晚播映的第34集《溏心風暴之家好月圓》，講述Jo飽（夏雨飾）相約紅姨（米雪飾）的前夫油面王（李國麟飾）到飛鵝山講數，竟被油面王一拳打到視網膜脫落，要入醫院做手術。阿卡（陳豪飾）為「家好月圓」搞宣傳活動，突然間心臟病發，發現他原來有隱性心臟病，在35歲前隨時會病發身亡。嫲嫲（李香琴飾）為阻止紅姨賣「家好月圓」五成股權給油面王，大鬧會議室，激動至心臟衰竭。
Jo飽思前想後，不想阿圓（黎諾懿飾）一世受紅姨（米雪飾）擺佈，偷偷離開醫院，決定在「家好月圓」股東大會上講出真相，反過來指控紅姨和其幫兇，並以持牌人身份阻止紅姨賣出「家好月圓」五成股權。
溏人心聲
最愛劇中金句--「唔使驚，荷媽喺大廳！」
「呢句說話我哋幾兄弟姊妹成日講，所以比較印象深刻，而且呢句說話令我哋全家人好有安全感，咁我自己本身中文唔好，所以好多金句我都唔知。」
自選最愛場面--反串嚇親自己
「有場戲講我哋幾兄弟姊妹為荷媽慶祝生日，我哋男嘅就要扮女人，所以好好笑，我本身未扮過女人，雖然佢哋話我嗰look好靚，但係我自己照鏡時覺得某啲角度好嚇人。」
表現最好演員--周驄寶刀未老
「我覺得係琴姐同周驄叔，佢兩個真係做得好好，令我覺得佢哋雖然年紀比較大，但依然可以喺呢個圈咁耐係有一定原因，佢哋啲戲真係好好，令我好欣賞，加上佢哋成日教我哋話長輩講嘅嘢要用心聽，原來真係好有用。」