港股上周再跌580點，2萬大關失守，由去年10月底的31958高位開始的大跌浪，到上周低位19157，已下跌12801點，跌幅足足40%，支持位接連失守，下一個支持在18500。
噚日香港假期，冇市，外圍就繼續跌，雷曼危機一日未解除，股市就冇得好，博反彈亦未係時候。
不過，港股已跌咗咁多，再壞落去，又會跌到幾多點呢？現時18500、18000同17500都有人估，暫時最淡嘅係睇15000點，即係會再跌22%。
在大跌4成之後才斬倉，係迫不得已，唔少大中小股的跌幅更係以7至9成計，但形勢比人強，要斬亦冇計，但要有心理準備，在低位要買番。
大市由去年10月底的31958掉頭回落，到今年3月18日的低位20572，完成第一個跌浪，時間係4個半月，幅度35.6%；其後反彈到5月5日的26387，開始第2個跌浪，到上周五為止，已有4個多月。本周股市會繼續尋底，雷曼已宣佈申請破產，金融海嘯出現，除非有戲劇性變化，否則恒指極有可能會跌多一千幾百點，到時候，時間和跌幅都「拍得住」上一個跌浪，隨時會到底回升。
江銅鞍鋼吼位博反彈
即使係最壞打算，恒指會跌到15000點，亦唔會一次過跌晒，中段會有一個大型嘅反彈浪，上一次由20572彈上26387，幅度就有28.2%，下一個反彈浪，幅度亦好可觀，個別跌幅大嘅股票，升幅甚至可達4至5成。
黎明前係最黑暗嘅，今時今日，壞消息沒完沒了，雷曼之後，仲有唔知幾多間大行會出事，洗倉潮此起彼落，呢半個月，直情係恐慌性拋售。大價股被洗倉，一日跌十幾個巴仙嘅，比比皆是，但散戶已心死，以百億元計嘅貨，去咗邊？邊啲人接咗？又係一次財富大轉移。
好多已大跌嘅股票，例如江西銅業（358），由高位32元跌到不足9元，跌幅72%，鞍鋼（347）跌幅79.2%，合生創展（754）跌幅83.1%等，都係可伺機低吸博反彈的對象。
郭兆誠