紐卡素鬧劇周日有突破性進展，班主艾殊利喺球迷壓力下宣佈投降，決定將球會掛牌出售。不過，呢個肥佬臨走都要打爛幾張枱凳，「反對派」嘅球會大使舒利亞突被終止職務，馬田斯更被禁止入場打氣。唉！何必搞到人人喊打呢？
「你哋好嘢！我賣！」紐記肥佬班主艾殊利，周日終於向群情洶湧嘅球迷投降，宣佈願意出售球會。不過數口好精嘅肥佬，講到明唔係大拍賣：「有人買我就賣！」據講，肥佬索價4億鎊（約55億港元），相比一年前入主使嘅1.35億鎊，想一轉手賺成2.65億鎊！
禁「亂黨」馬田斯入場
肥佬除咗要錢仲要搞亂檔，好似球迷英雄兼紐記大使舒利亞，因為支持離職嘅領隊奇雲基瑾，結果收到高層嘅炒魷電話；雖然之後會方發表聲明，澄清舒利亞合約至上季尾已完結，不過相信都冇幾多人相信。此外，亂黨馬田斯同比耶上周六居然被球場保安拒絕入場，理由居然係冇波飛！？
慘遭肥佬玩嘅何止一班「亂黨」，就算盟友足球總監韋斯同管理總監林比亞斯都受牽連。因為你肥佬就話拍拍籮柚袋幾億鎊走，韋斯等人被球迷視為幫兇，新老細上台仲會有得撈咩？所以呢，呢個世界千祈唔好助紂為虐，否則第日風向一轉，咪盞做替死鬼？
發聲明扮可憐
或者，艾殊利自知罪孽深重，周日透過《BBC》發表長達1,644字嘅聲明，講述自己嘅足球之路；仲大賣父子情，話球迷喊打嗌殺，搞到唔敢帶仔女入場睇波。我求大俠唔知呢啲係咪鱷魚淚，不過紐記呢一年經過肥佬之亂後，短期內都好難恢復元氣。