因為一年四季都可以食到秋刀魚，使它向來不受重視。不過一到每年9月，平平凡凡的秋刀魚都變得肥大肉厚，皆因9月秋天是牠的當造期！事關秋天正值秋刀魚的產卵期，甘香的魚油特別多；但一到了10月上旬，秋魚刀便會回復瘦削，所以想食就要快手！點煮？一於來個香口「煎皮」，加上啖啖肉「拆骨」。
記者：周靜雯
攝影：伍慶泉
拆骨─啖啖肉唔要肚
秋刀魚之所以得其名，傳聞是由於其形修長如刀，和因為秋天是牠的生產期。但由於牠一年四季都可捕獲，加上魚肉瘦小、粗糙且腥味重，所以在日本人眼中只是下價魚。不過，到了9月份，合時的秋刀魚即時變成搶手貨！每條魚約重250g，因為魚油增多，令肉質較腍，鮮甜而不腥。這個時分的秋刀點整好，計我話，首選係拆骨，先到啖啖鮮甜魚肉！秋刀魚本身細骨較多，而且集中在最肥美的魚肚位，亦令該部位較難去骨；至於魚脊，除去中央的大骨便可，故此做刺身等菜式，總會放棄魚肚不吃。技巧方面，為秋刀魚去骨唔可以靠蠻力，手法要輕、落刀要準，因為它的肉質腍，力度一大成條魚就散晒。
秋刀魚明太子紫菜揚$180
總廚華哥創作的啖啖肉菜式，用魚肉包住明太子，捲上紫菜後再以薄漿脆炸。明太子味道鹹中帶辣，可以引出秋刀魚肉的鮮味。而且紫菜揚炸得香脆，是佐酒的不錯選擇。另外，怕腥的朋友，想感受一下秋刀魚之味，這道菜可以作初次嘗試。
秋刀魚蘿蔔苗味噌醋$180
燒香的秋刀魚肉，加上蘿蔔苗、雜菜及自家調製的味噌醋汁，清新開胃，是日本版的凱撒沙律。
秋刀魚刺身$180
想試秋刀魚但又怕腥？其實新鮮的秋刀魚肉腥味較淡，如果條魚係冰鮮或急凍就會腥味重。
個刺身好好食，一啲都唔腥，可能我本身食慣魚生。加上我鍾食肉質較腍的食物，秋刀魚肉入口好滑，有種好肥的感覺，口感好好。
櫻田日本餐廳（26943810）
沙田白鶴汀街八號帝都酒店三樓
煎皮─芥末醬汁原條燒
有人覺得唔食魚肚好嘥，的確係。要食秋刀魚肚，煎魚不但令表皮變香脆，而且滲出香油十分香口；不過，逼出魚油後魚身卻被煎亁，於是改良成燒，以鐵網隔空BBQ，本來一樣會變亁，但在魚燒至半熟時，以芥末醬汁淋在魚面上，則既可保留肉汁，比較Juicy之餘，又不失香口。而且日式燒秋刀魚可去除腥味，醬汁更可減低吃魚內臟時的苦澀。「十人十色」經理危先生：「試過好多種醬汁，之前有隻秘製辣醬，但味道較為辛辣，而且如果醬味太辣會蓋過魚味。」現在最受歡迎的芥末醬，甜味較重、少辣唔嗆鼻的醬汁。將魚燒至半熟，再淋上醬汁，利用底面爐燒令醬汁滲入魚肉內，魚皮燒得香脆。魚肉會比只用鹽燒更為Juicy。
梅子醬燒秋刀魚$38
醬汁燒秋刀魚的另一選擇，但味道較酸，故比較適合喜歡食酸味的朋友。
薯絲Soba$38
Soba即係冷麵，利用薯仔切絲做麵，質地爽口，配上冷麵汁，最啱炎炎夏日食。
芥末醬燒秋刀魚$28
師傅將芥末調製成甜味較重、少辣唔嗆鼻的醬汁。利用底面爐燒的方法，令醬汁滲入魚肉內，醬面及魚皮燒得香脆。
食芥末醬秋刀魚時記得放檸汁，可以提升魚味，成道菜更好食！
十人十色（25678678）
西環堅尼地城卑路乍街18號地下D舖