朋友送來一份CV，叫左丁山代為留意有冇工做。睇份CV，主角讀新聞傳媒，志願係做記者，不禁嘆了一口氣。這年頭，做記者人工唔夠高，工作時間長，晚晚冇覺好瞓，出外採訪直情係日曬雨淋，如果被派做狗仔隊就仲慘情。
不過朋友之朋友W，乃係新聞系碩士，志在吸收實際經驗，想入行做記者，確係無可厚非，做新聞記者，見識會廣博好多，當係人生事業之踏腳石，亦無不可。呢排左丁山幾乎晚晚去咗睇殘奧馬術賽，見到現場觀眾雖然比奧運馬術賽少好多，但氣氛仍然幾好。聽講各屆殘奧之中，馬術賽嘅觀眾以香港今次最多，外國代表讚口不絕，證明香港人辦事能力高。在場當然有記者啦，靚女C晚晚在場，同記者相熟，從記者口中，知道一啲前線熱心嘅記者，往往可以被坐在冷氣間嘅編輯扼殺熱情。
電台主播L某晚睇殘奧馬術，見到失明選手、雙手截斷嘅選手上陣，為選手堅毅不屈嘅鬥志所感動，認為電視台如果肯播出嚟，會係最佳勵志新聞片。左丁山就睇到一位南非漂亮女選手以獨臂控制韁繩，勇奪金牌。但電視台點解唔播，好多報紙冇報導呢？一位記者好無奈咁對靚女C講：「我哋在現場都好感動，打電話返報館留版位，作較詳細報導，但編輯話可以慳番喎，讀者對殘奧冇興趣，無謂寫咁多字噃！」另一位就接到柯打，要留意現場有冇蝦碌事件，有冇「衰嘢」可以報導，其他唔使寫咁多。靚女C真係聽到心都實晒，佢在殘奧馬術賽最後一晚對左丁山講：「前線記者幾搏命㗎，但想寫多啲都唔得，啲編輯根本唔理。」邊啲新聞可以賣紙，編輯認為「有料到」呢？強姦、燒炭、墮馬死人等等啦，「身障者」（日本語）之毅力鬥志，不值一哂。在香港咁嘅環境做記者，有時確實心淡，但以左丁山所見，啲記者敬業樂業、拼搏心強，幾令人感動，香港主辦奧運馬術賽、殘奧馬術賽能夠圓滿結束，備受國際讚譽，應該讚埋香港記者一份。但最值得讚嘅，左丁山認為係所有義工，佢哋捱更抵夜，枵腹從公，站穩崗位為香港聲譽而戰，值得所有香港人大力鼓掌，佢哋真正係香港之光。