〈早飛倉〉連續兩次失手，敗晒畢傑兄嘅結餘不特止，更加倒輸，真係要同各位讀者同畢傑兄講聲「鎖你」；本住贏谷輸縮心得，今次小注出擊，矛頭指向法甲愛隊里昂主W身上。
里昂今屆歐聯分組賽抽籤唔算理想，編入F組，同組對手有拜仁慕尼黑呢隻老虎外，仲有費倫天拿同布加勒斯特星隊，周三主場對費倫，兩隊相信目標都放在次名出線；里昂上周六聯賽只險勝尼斯3:2，好似唔對辦，不過睇陣容就知佢留晒力搏今場，賓施馬、高禾、杜拿蘭、比基安尼等法國國腳全部打後備，好在賓施馬後備入替建功，幫球隊反勝，而且除了克拉克同卡達基達外，里昂都冇咩傷兵問題。
費倫歐聯經驗輸晒
相反費倫場意甲聯賽踢周日，已經比里昂少休息一日，而且因為首仗已經賽和祖雲達斯，球隊心大心細，唔想連續兩場聯賽失分；結果梅度、基拿甸奴、蒙杜利禾等主力全部正選，結果反輸1:2畀拿玻里，真係輸波又輸士氣。歐聯一向講經驗，里昂近季都係常客，主場更有保證，上屆主場對巴塞、曼聯等勁旅都唔使輸，相反費倫已闊別歐聯多年，經驗點及得里昂豐富。
配腳吼葉士域治下盤
之前兩日都因為太多心，搞到過關失手，今次配腳唔搵咁多，單搵一場英冠賽事：修咸頓對葉士域治；以修咸頓呢排頹勢，上仗大敗予昆士柏流浪，兼有蘭卡舒利領紅；今次點讓「老葉」平/半，博下盤。
〈早飛倉〉
主菜：星期三8里昂勝（1.8）@500
渾水摸魚過關：星期三8里昂勝（1.8）x星期三14葉士域治（下）2x1@300
今日早餐價錢：-$800
上日賺蝕：-$1,000
早飛倉投注後結餘：$97,315
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周中早飛超級重心
星期三11 皇家馬德里大（1.82）
睇過皇馬上仗嘅表現，後防比比、梅斯達好唔過紙板幾多，皇馬入到波，但後防又失番2、3球，對白俄巴廸，入球「大」比「主勝」更穩。
星期三15 卡拉馬勝（2.25）
大阪飛腳人面全非，日職聯都搞到唔掂，周三亞冠盃8強首回合，作客敘利亞嘅卡拉馬，點都要博主W。
星期四15 AC米蘭勝[-1]（待定）
AC米蘭聯賽連輸兩場，可幸有卡卡復出，當畀安察洛堤最後機會，主場對蘇黎世捧埋今次啦最多。
難啃早餐
星期三7 祖記贏唔到
祖記上仗千辛萬苦先一粒贏烏甸，尼維特、廸比亞路已明日黃花，辛尼特屬正牌黑馬，贏過紅魔鬼，又點會怕老婦人。