選舉之後，與朋友碰頭，話題離不開投票。洋酒Ｌ在九月七日早上出門旅行，出門之前趕去票站，自己投畀公民黨余若薇，叫兒子投畀楊森，跟住趕去機場；律師Ｗ話佢投咗畀大狀黨，賓架Ｙ話投咗畀葉劉，住在港島嘅中環朋友大多如此，以投畀余若薇、葉劉嘅佔多數，不過有幾位在票站投完票，碰到有人在場做票站調查，佢哋居然人人都話投咗畀曾鈺成組合，唔怪得鍾庭耀今次做票站調查做到耍手擰頭。
又碰到年青醫生Ｎ噃，佢話功能組別選舉投咗梁家騮一票，以感謝佢為公立醫院醫生打官司爭超時補水。梁家騮呢位新人好似係無心插柳嘅，人哋拉票之時，佢就去咗打波，點知竟然贏咗中聯辦、港大醫學院、醫管局高層都力挺嘅何栢良，屬冷手執個熱煎堆之類，相信醫管局高層都諗唔到，要重新部署對策。當初佢哋驚住梁家騮分薄何栢良嘅票源，讓郭家麒漁人得利，點都估唔到梁家騮分得太多，竟然成為立法會議員㖭。梁家騮係中大第一屆醫科畢業生（一九八六新亞），與《頭條日報》劉國業及《都市日報》盧國麟、廣告界名人曾錦程（三人同屬新聞系）同屆，仲有一位經常在報紙發表大塊文章嘅陳雲（英文系）。咁講法，梁醫生既是外科醫生，梗係李國章嘅學生啦。
公立醫生Ａ有一段故事，不吐不快，佢曾經在瑪麗醫院及深水埗明愛醫院做過，發現一個奇怪現象，就係在明愛醫院，一啲基層階級送父或母入院後，好希望老人家盡快出院，醫生一聲OK之後，佢哋都唔知幾高興，兄弟姊妹齊到，一齊扶老人家返屋企；但在瑪麗醫院呢，某些中產階級衣着光鮮，口吐英語，送長者入院時冇乜表情，十零日之後醫生話長者可以出院，呢啲中產階級竟然到醫院罵醫生：「你哋照顧唔周到噃，咁快叫人出院嘅，我要見經理」，如是者糾纏一番，目的就係唔想接長者回家，想長者留在醫院，有咁耐得咁耐。有一啲極端例子就係病人子女走咗之後，以後唔見咗人，搞到長者在醫院舉目無親。醫生Ａ感嘆呢類中產階級讀飽書有個錢，但對長者之情義，遠不如勞工階層，佢問：「為何如此？」我哋唔識答，希望係個別事件，唔好以偏概全啦。