正是將軍一去，大樹飄零，自由黨飲食界立法會議員張宇人噚日朝早，連趕幾場出席唔同電台節目，趕到氣咳。稍事休息時，佢同八方講，近排真係好唔得閒，事關黨內兩個重量級人物，田少同周太雙雙辭職，代主席劉健儀又唔喺香港，蜀中無大將，廖化作先鋒，搞到佢要代表自由黨出席大大小小公開活動，張宇人變成「張忙人」。
張宇人透露，由於田少決定退出政壇，唔想多出席公開活動，不過相信田少對個黨會有長遠承擔，唔會好似前主席咁，一走了之。自由黨創黨以來得兩個主席，張宇人顯然好不滿飛哥。發叔走得快，肯定有古怪，八方收到風，個別黨員都有離心，雖然只係少數，不過對自由黨而言都可能係致命打擊，樹倒猢猻散，政治就係咁現實。