從政之路難行，揀錯路更加冇運行。有班唔識死後生仔，今年暑假攞苦嚟辛，去民主黨議員辦事處做實習生，為數約50個實習生，齊齊做助選生力軍。大家初時以為一早起身派單張最辛苦，點知原來晚上洗樓先係地獄式非人經歷，因為新型公屋一幢樓有成40層，一晚洗兩幢樓，行足80層，行到腳軟，差啲返唔到屋企。
幾十個實習生捱完一個暑假，噚日舉行「畢業典禮」象徵計劃告一段落，民主黨主席何俊仁聲言區議員有助立法會選情，日後要深耕細作地區工作，呢班新秀有冇可造之材呢？據講部份議員有興趣向佢哋招手，但由於佢哋都係學生，暫時未必有太多時間，如果有人選擇去民建聯，更加阻止唔到，大家都知，一登禮賓府，月薪七萬㗎！