《蘋果批Online》逢星期一、三、五晚上九時開騷
Click入http://pie.appledaily.com收看
歡迎透過web-cam即時發表意見或致電29908648安排親身上場
電郵：mailto:[email protected]
網誌：http://pieatapple.wordpress.com
今屆選舉功能組別，我哋見到多咗候選人上街拉票；又或者更熱衷出席唔同嘅選舉論壇，似乎同過往有少少分別。《蘋果批》就請嚟用搞笑方式嚟辯論、曾兩度參選會計界嘅黃宏泰，同我哋一齊馬後炮分析功能組別選情……
主持：楊卓華 高明輝
1
今屆會計界參選人數較少，你係咪刻意用棟篤笑嘅方式去表現自己？
黃宏泰：都唔係刻意，因為事實上咁多論壇，其實都幾沉悶，今次你話點解毓民咁犀利，係因為啲人唔想咁悶囉！同埋選舉過程入面，最好睇就係你點樣揭露人哋唔想俾人揭嘅嘢出嚟，呢度先犀利……你話好平鋪直敍，人哋真係轉台，唔係講笑。
2
有人喺我個blog度留言，話你係建制派嚟嘅，話你有中聯辦背景，你有冇先？
黃宏泰：我有朋友喺入面做，話冇你都唔信啦，因為我玩政治團體係講緊超過十年，但係老老實實，如果我係講到好似咁嘅關係，當時會計界兩條梯隊，有冇一條預我？咪又係我自己一個出嚟……
3
今年無論係地區定功能組別，選舉論壇都特別多，亦都有好多迴響，你點睇？
黃宏泰：其實玩政治就係要將啲複雜嘅嘢簡單化，我個人覺得點解今次公民黨唔係咁成功呢，因為佢哋做律師背景鍾意將啲簡單嘅事情複雜化，你喺論壇簡單嘅事情，你要好一針見血，講出個問題所在。
有人質疑譚香文一封寫畀財經事務及庫務局局長陳家強嘅信，內容建議所有企業及個人都要請會計師報稅一事。其實呢樣嘢，會計界選民受唔受落呢？
黃宏泰：我啲行家未有呢種感覺，畀佢做都要肯做先得㗎，老老實實，填稅表唔係（賺）好多錢。
4
你就參加過兩次功能組別選舉，你覺得喺04同08年兩屆有冇分別？
黃宏泰：肯定係激烈咗，（以會計界為例）因為上次都冇機會辯論……同埋上屆大熱門完全都冇嚟街度見人，真係好少，可能覺得會計師形象唔好周街行，但係今次我哋見到贏出嗰位（陳茂波）真係落街着晒啲T恤去派單，係個直選味道喺度囉……人哋畀票你搭車去（投票）用一個半個鐘，你都要人哋條氣順㗎！上屆譚香文有派單，做齊。你唔可以唔做，你選舉期間畀人覺得個誠意好緊要。
除咗部份完全冇競爭、自動當選嘅功能組別議席之外，似乎今屆功能組別同之前最大嘅分別就係要更加面對群眾。一啲有競爭嘅界別，好似醫學界、旅遊界等等，都要出席論壇，同其他對手直接辯論，唔可以再自恃專業而遠離群眾。
