隔牆有耳:林子祥同華仁仔練歌 - 李八方

隔牆有耳:林子祥同華仁仔練歌 - 李八方

歌星林子祥(阿Lam)近年好少公開演唱,噚日佢就同過百名華仁仔喺香港華仁書院禮堂盡情jam歌,深受現場家長歡迎。原來,阿Lam應承咗下月27號,義助「華仁一家基金會」,喺會展舉行一場慈善演唱會。
阿Lam噚日同咁多華仁仔練歌,其中當然包括街知巷聞、近日電視劇都係咁播嘅《分分鐘需要你》。主辦單位安排咗五位中七華仁仔伴唱,雖然首歌紅嗰陣,佢哋都仲未出世,效果依然唔錯。
據聞演唱會反應唔錯,5,000張飛賣剩幾百張較貴價、包括最前位置嘅2,000蚊飛。主辦單位話,門票加埋其他贊助,300萬籌款目標已經達標。校方話,筆錢會用嚟推行小班教學、支持學生全人發展,同埋資助教師再培訓。