Longweekend，約啲friends去IslandSeafood&OysterBar。呢排好多食蠔中毒新聞，但我唔驚，因為有行政總廚Ricks教路嘛。有人將急凍、冰鮮蠔扮新鮮生蠔，Ricks哥好易分辨，我將佢教嘅綜合為「情人三部曲」。
要合眼緣又要索
第一「合眼緣」，新鮮蠔表面有光澤，因為只係離開海水冇耐。第二「親密接觸」，將隻蠔拎上手，新鮮蠔特別墜手，因為仲保存咗水份；仲可以細細力敲吓，有空洞洞嘅回音，即係水份已經流失晒，唔夠新鮮。第三係「要索」，用個鼻索吓佢有冇海水嘅鹹味，係就夠晒新鮮。
如果仲驚隻蠔唔新鮮，而且，老闆見你搞咁多嘢都唔趕你走，Ricks哥話仲可以「攻擊佢」，用刀或叉掃開蠔嘅群邊，如果新鮮，群邊會收縮：「唔好篤啲肉喎，因為蠔嘅敏感部份係啲群邊度。」佢話9月開始係法國等歐洲蠔最肥美季節，一隻靚嘅約40蚊至80蚊，食完嘅aftertasting可停留15分鐘㗎。
佢話教我點食最正，我話我都識啦，即場示範佢睇。先飲啖清淡白酒或香檳，放隻生蠔入口咬兩啖，將吞未吞之際，再飲少少酒，等啲蠔嘅鮮味湧出嚟！嘩！我食完之後問佢係咪咁，只見佢呆咗兩秒先答：「係呀。」
電郵：mailto:[email protected]
逢周六、周日刊出