噚日中秋節創下13年來最高溫，天時暑熱連人都特別躁，好似最近頻頻代表自由黨發言嘅張宇人，噚日喺個論壇上，香港中華廠商聯合會嘅代表李秀恆批評，自由黨只代表少部份商界意見，又話自由黨應該開放啲，同不同商會接觸，張宇人雖然會上保持克制唔還拖，但會後都忍唔住，仲爆咗句疑似粗口。
張宇人會後同八方講，廠商會代表話自由黨唔同佢地溝通，以廠商會上任議員呂明華為例，過去同自由黨就冇乜兩句，「你哋呂明華喺度起晒槓，連我哋行埋啲都唔想，講多兩句佢就話：『挑！使乜你呀！使乜要搵自由黨』，話呢個會其實都有問題。」
毓民叫人返去打靶
八方噚日搵唔到呂明華求證係咪曾經有咁講過。面對所屬嘅富貴黨直選輸之後各方嘅說話，張宇人噚日頗為感觸咁話，「當你衰到趴地嘅時候，就會睇到邊啲人會借勢踩多腳，邊啲人會扶番起你。」正、副主席辭職，代主席劉健儀又去咗外國探仔女，臨時頂檔嘅張宇人，做黨代表嘅工作好快結束，下周日就會同老婆飛去地中海，直到下個月立法會宣誓就職至返香港。
其實噚日言論火爆唔止張宇人一個，社民連黃毓民面對一班維園阿伯台下爆粗鬧佢，都忍唔住喺直播期間用番阿伯嘅原話回應，叫鬧佢嘅人：「返去打靶啦！收聲啦！」火藥味十足。毓民嘅火爆作風，一向受網民歡迎，佢不時亦會喺個網台上，爆粗直斥唔少政府官員，頻率最高嘅係煲呔，佢稍後正式就任做尊貴嘅議員，好多人都會留意佢係咪會貫徹一向嘅語言風格。
其實個別議員都有出位言論。喺鏡頭以外，長毛梁國雄經常忍唔住爆粗，潮州怒漢詹培忠經常大大聲講嘢，喺記者面前亦偶爾爆粗，佢哋都算係立法會嘅「敢言」代表。
根據《會議常規》規定，如果議員行為極不檢點，立法會主席、全體委員會主席或任何常設或專責委員會主席，有權命令議員立即離場，禁止佢哋繼續參與會議，所以一眾議員一坐入議事堂，都要諗清楚先好爆粗，因為佢哋唔同唐唐，可以喺議事廳講「條條fing」畀人批評過於粗俗，主席都由得佢。
mailto:[email protected]