好多香港人因為遲瞓覺，所以都有食消夜嘅習慣，消夜食得多容易肥，唔食又好肚餓瞓唔着。時時都有朋友問：「有無食咗唔肥嘅低卡消夜？」我醫神做咗啲功夫，歸納咗美國營養學專家嘅心得，推薦幾款健康消夜餐組合畀大家，好似粟米粥加麥包、蜂蜜麥包多士加牛奶、或者全麥餅亁、合桃加紫菜湯。
色氨酸抑制中樞神經
健康消夜最少要符合易消化同促進睡眠兩個元素，美國麻省理工學院嘅營養學家就話，含色氨酸、維他命B、鈣同鎂豐富嘅食物，都可以幫助鬆弛神經同消除煩躁，瞓覺之前食既可飽肚，又有安眠作用。
色氨酸可以抑制中樞神經，令人無咁興奮，甚至會有啲攰攰哋嘅疲倦感覺，如果同碳水化合物、蛋白質豐富嘅食物一齊食，可以發揮最大嘅催眠效果。米飯、南瓜子仁、腐皮、蝦米、紫菜同黑芝麻都有好多色氨酸。維他命B豐富嘅食物可以幫人消除煩躁，做完一日嘢，梗係會積埋好多唔開心嘅負面情緒，好容易影響睡眠，所以瞓覺之前食啲維他命B豐富嘅全麥食品，例如燕麥片、全麥麵包或者餅亁，應該就無咁易失眠。
安眠藥、鎮靜劑用得多會依賴，醫學界發現含鈣同鎂嘅食物係天然鎮靜劑，可以令人放鬆神經，所以鈣質豐富嘅牛奶一早就被人視為天然安眠藥，再加埋有豐富鎂質嘅堅果類食物，好似合桃，食咗應該可以改善失眠。
blog主：醫神