財爺鬍鬚曾噚日帶埋太太趁中秋節落區，去咗北區探望居民同長者，仲喺粉嶺嘉福邨同一個家庭一齊食晚飯過中秋。
鬍鬚曾一向鬼佬作風，佢去人哋屋企食飯，照計唔會送一籃生果或者好似啲中央官員咁，送套茶壺咁傳統。佢並冇帶支靚紅酒硬銷香港係紅酒中心，反而係整咗個煲仔菜赴宴，仲係一個牛腩煲㖭。
了解完草根生活
到底鬍鬚曾帶住嘅牛腩煲好唔好食，牛腩夠唔夠腍、份量夠唔夠同男戶主陳先生一家五口齊食，八方唔在場，都好難評論。經營私房菜嘅食家劉健威就話，雖然煲仔菜通常會係天寒地凍時候食會滋味一啲，而噚日香港天氣炎熱，好似唔多適合，但實情好多香港人一年四季都照食煲仔菜，就好似大熱天時照樣食火鍋咁，話總之好味就得，況且煲仔菜翻熱容易，咁遠攞住由港島去到粉嶺北區，都可以照樣好味喎。
不過探訪都只係門面，最重要仲係鬍鬚曾了解完草根階層生活之後，真係交功課，做番啲嘢幫大家抗通脹。