一班候任議員噚日應港台同消委會邀請，出席一個格價節目，席間各人被問到如何抗擊通脹時，講出唔少搞笑方法。當中最宏觀嘅，絕對係公民黨梁家傑同工聯會潘佩璆，佢哋認為最重要係訂立公平競爭法，只有防止超市壟斷，市民有選擇先可以買平貨。社工出身嘅民主黨黃成智，就話可以透過社會服務團體，幫市民一次過大批入貨，透過團購應該可以慳唔少。
工聯會黃國健就好搞笑，建議大家可以考慮學佢食沙律，年中慳番唔少煤氣費；點知街工梁耀忠仲激，話呢輪通脹咁勁，佢已經冇再食貴餸，平日食得最多係豆同薯仔，好似當兵行軍咁。不過呢個方法都未算最絕，因為有人提出「絕食」，抵抗通脹最好方法就係「食少啲」。呢個抗通脹妙法，係由最近成功減去30磅嘅富貴黨飲食界議員張宇人提出嘅。呢一招，張生你有「本錢」就使得啫，窮到冇得食，瘦到條柴咁點算先！