立法會選舉完畢，不少新面孔湧現，立法會將有一番新氣象，至於對曾特首是好是壞，目前難以判斷，但既然有黃毓民呢位反曾急先鋒在，曾特首辦班智囊要小心應付咯，煲呔針嘅角色日益重要。
選舉期間，左丁山幾乎日日都收到陳茂波與譚偉豪嘅電郵，但左丁山並非會計界與資訊科技界嘅選民，冇權投票，不予評論。但在九月三日收到「波仔」（以後要改稱陳議員）電郵，十分幽默，顯示出波仔苦中尋樂，念念不忘「艱苦我奮進」之新亞精神。波仔畢業於中大新亞書院會計系（一九七七年），同班同學有新鴻基地產董事黃奕鑑，兩人亦是禮頓山鄰居，老友到不得了，同屆同學有一位鄧志祥，係廣告界知名人物。
波仔之九月三日電郵介紹一個減肥秘方，個半月之內減肥十五磅，腰圍減咗三吋，各位有興趣嘅話，可以照辦煮碗，波仔嘅秘方如下：
06:00至07:30：緩步跑
07:30至08:00：淋浴，吃輕便早餐
08:15至09:30：企在街頭派傳單，緊記塗上太陽油防暴曬
09:30至10:00：飲番杯茶
10:00至12:30：拜訪會計師樓
12:30至14:00：企街派傳單
14:00至14:30：午飯快餐
14:45至18:00：拜訪會計師樓
18:00至20:00：參加噴血政治論壇
20:00至21:00：晚飯
21:00至23:30：上網、睇電郵、寫電郵
周末又如何？唞番吓？唔係噃，周末係開會時間，與助選團隊檢討及研究對策，緊記絕對唔可以同朋友吃飯，否則競選經費容易爆燈，隨時坐監！九月九日，陳議員得閒覆左丁山電話嘞，向佢恭喜之餘，請佢注意身體，唔好失重過多！「餓我體膚勞我精」嘅競選狀態已經過去嘞。陳議員身為第一位中大會計系校友做ACCA會長，第一位中大生做HKICPA會長，現在又做埋會計功能組別立法會議員，仲會唔會更上一層樓呀！
（更正：星期五本欄講質保局讚中大，陳南祿主席睇完，對左丁山哈哈大笑：「剃人頭者，人亦剃其頭。教資會秘書長係MichaelStone，唔係PaulStone呀！」唉吔，一聽為之面紅，自己識得Michael嘅噃，為何寫成Paul？撞鬼！）