早兩個月，行貨TOYOTANoah先登陸香港，話咁快，加兩個天窗兼有埋按鈕式點火嘅豪華版又殺到。Noah以座椅實用多變響朵，上次全力畀機會佢ShowOff，花樣多多睇到眼花撩亂。今次豪華版基本配備兼規格不變，咁就有時間去發掘一下百變本色背後，究竟係純屬花招，抑或係絕對抵讚。
記者：黎頌詩
攝影：楊錦文
Model：Winnie、Suki
升級夠實際
豪華版Noah嘅加「豪」配備唔算多，全車內外嘅基本格局維持不變，最搶嘅莫過於車頂上一大一細嘅天窗，巨型嗰個更加可以完全打開，內櫳開揚感大提升之餘，遲啲秋高氣爽之際，一路上仲可以同大自然玩親密，諗起都爽。其他嘅幾項新增升級設備，仲有智能車匙、按鈕式啓動系統、自動開關車頭燈，同埋軚環音響控制按鈕。升級嘅全數係有實際用途嘅配備，喺裝潢粉飾上，則完全不變。至於規格同性能表現方面，亦同標準版完全一樣。上次見識過Noah內櫳嘅變臉招數，座椅轉向、變床、再變超大尾廂，睇到嘩嘩聲。Noah喺座椅上嘅心思，的確抵讚，作為一部家庭車，兼顧得頗全面。我最Buy係變臉時操作相當簡易，唔使舞到一頭汗。而當中嘅中排轉向座椅，有嬰兒嘅家庭一定好啱使。至於變大床，實用程度似乎就見仁見智。
摸清師奶心意
Noah內櫳驚人闊落，係另一個令我好欣賞嘅地方，難得係三排座椅都全無侷促感，美中不足嘅係，如果只係簡單地推前中排，後排出入口依然頗窄。除了座椅，車廂中針對一家大小嘅陳設都唔少，從遇上障礙會即時回彈嘅趟門、門邊低位嘅把手，到喺車廂各處嘅細小貯物位，你都睇到設計者真係好細心。最抵死都係椅背上嘅掛鈎，令我即時諗起喺公共交通工具上見唔少阿婆大嬸都自備一鈎，將大袋細袋掛喺椅背。咁細微嘅師奶需要都摸到清，佩服。設計夠細心呢點，操控起嚟亦體會得到。坐上駕駛席，超巨型車身帶嚟嘅操控壓力竟然唔多大，梗係，後泊鏡頭同左側鏡附設嘅下視及車頭角位鏡都幫上唔少忙。試車當日坐足5個人，143匹當然爆炸力欠奉，不過沿途穩打穩扎，司機乘客都舒舒服服，安全第一。一句講晒，就晒一家大細啦！
規格
引擎：1,986c.c.直4VVT-i
馬力：143ps/5,600rpm
扭力：19.8kgm/3,900rpm
傳動：SuperCVT-i
查詢：皇冠汽車（28661020）