近來港產片一潭死水！蚊型製作、奀星孭飛又製作求其，單日票房僅僅過萬，搞到個個寧願返屋企睇《家好月圓》，可能李香琴真係吸引過曾凱玹。要睇嘔心瀝血大製作，都係要派出王牌導演吳宇森，《赤壁》DVD一出街碟場又旺番晒，淨係梁朝偉、金城武、林志玲鑽石陣容已經等如必買，加上人人睇完話好好笑，究竟導演搞乜Gag？買隻DVD睇過咪知囉！
記者：吳允冲
不忠原著Gag位多
《赤壁》由曹操挾天子以令諸侯開始，到諸葛亮（金城武飾演）與周瑜（梁朝偉飾演）聯手於赤壁擊敗曹軍，內容同戲院版完全一樣、片長140分鐘。《赤壁》最為人詬病係故事不忠原著，其實將沉重的歷史輕鬆幽默化，對於唔熟悉三國演義的人來說更易消化，起碼娛樂性豐富！Gag位好密集！一幕幫馬仔接生，對劇情有否幫助就唔知，但係趣味性就絕對有！而諸葛亮的口頭禪「我需要冷靜一下」和「略懂」亦成為金句。
戰事場面聲畫一般
戰爭場面唔算多，必睇係開頭場關羽、張飛、趙雲力抗曹軍，同埋尾場聯軍與曹軍陸戰的一幕八卦陣；論聲畫表現，畫質OK、聲效澎湃，感覺算是合格有餘。
唯一可惜是欠了赤壁之戰最重頭的「火燒連環船」！唔好以為DVD版刪減了，正如好多人入完戲院睇，先知《赤壁》玩粵語殘片式「下集大結局」；等唔等下集上畫？或再等「預料之內」必出嘅上、下集BoxSet？咁就要睇閣下忍功如何！
取景一流惜CG效果假
相比起張藝謀拍的古裝片，吳宇森執導下的《赤壁》戒絕浮誇，視覺效果以自然為主，好似拍攝山河風光的鏡頭就非常壯觀，大山大水好有氣勢，不過CG確實失手，例如高空俯瞰曹軍船隊一幕，效果就有欠自然，遠鏡一睇就睇得出CG同實景的分別，有時仲以為睇緊宮崎駿動畫。亦有人埋怨吳大導的簽名式風格太突兀，好似白鴒就玩完又玩，而且太常用慢鏡，成日窒住窒住，唔得流暢，令到成齣戲太冗長。
例牌BONUS 勁行！
聽聞偉仔係仗義替發哥飾演周瑜，喺雙DVD套裝內的Bonus中就會睇到導演真情剖白，另外仲有預告、故事同人物介紹同首映禮片段等基本材料；不能錯過的是導演同一眾演員的訪問。
價錢：$123（DVD）/$228(Blu-ray)
音效：dts5.1、DD5.1
區碼：全區碼
片長：140分鐘
查詢：DVDPro（23326326）
地址：旺角奶路臣街6E德發商場地庫B4舖
