退休高官王永平早前客串做選舉論壇主持人，奉旨寸爆候選人娛人娛己，選舉結束，佢又重回校園兼職講學。平叔喺中大政治及行政學系兼任教授，上個學期初試啼聲，頗受學生歡迎，唯一美中不足，係佢用英文教書，部份學生上堂時去咗「釣魚」。
平叔對自己要求高，希望精益求精，一於支持母語教學，今個學期本來想轉channel用廣東話教學，誰知今年有個非本地生報讀平叔課程，有識貨之人，平叔暫時唔可以照顧大多數人意願，要繼續用英文教書。
其實用邊種教學語言冇所謂，最緊要學到嘢啫，陳克勤係中大政治系出品，咪就係人辦囉。八方聽聞平叔今年會傳授考AO嘅秘訣；至於想走捷徑嘅學生，唔使上堂，填表入民建聯就得嘞。