一拖（038）跌到落四年嚟嘅「長城鋼價」，基本因素又唔曳，睇位博番轉。純睇圖，一拖04年以嚟，跌穿1蚊收市月，只得一個月咁大把，其餘時間，全部守喺呢個大位區之上。一拖現價1.12元，已經差無幾。而一拖最新NAV3.5元，現價折讓高達68%，作為扶農國策受惠股，有咁誇張嘅折讓，亦可能解釋到，一拖一掂到長城鋼價就彈嘅原因。
又一拖08年半年度（6月底止）純利到7794萬銀（人仔．下同），跌咗近35%。純利倒退，並唔係本業唔省鏡，主要因為集團上年同期，計入咗一筆投資收益7378萬銀。唔計入呢項非經常性收益，純利實際係有增無減。又保守計數，一拖下半年度純利，睇齊上半年，全年純利1.55億銀，預期PE都係講緊5.3倍，平得交關。一拖再跌，睇實1蚊撈底，博翻半番到1.50元，預期PE都係講緊7倍咁大把。
深科有睇頭可冷吼
深圳科技（106）最近NAV1蚊，現價（0.25元）折讓，講緊75%。仲未止，集團今年6月底止，揸住淨現金5.17億銀，每股淨現金0.42元，又係高過現價。又深科呢期主打物業投資及買賣，08年半年度（6月底止）嘅純利1.33億銀，已經超過07年全年度純利1億銀。就當集團下半年度打個和，08年度純利keep住上半年1.3億銀水位，業績已經有睇頭。嚟轉冷吼，博深科上番每股淨現金值0.42元，講緊要升68%。
錢雋