我係張如城　邊個夠我型

有「亞洲神童」之稱的張如城繼01年推出個人創作CD《愛意》，相隔七年，再推出新派台歌《友誼的光彩》，不過就被網民惡搞成《有耳的棺材》，大玩食字兼將歌詞搞爛gag，YouTube的點擊率更高達七萬次。全城熱話，城城卻只在乎自己的音樂，對一切挖苦都充耳不聞，繼續高呼：「熱愛生命，熱愛音樂，我歌故我在！」堅持自我，也算型的一種㗎。

記者：蒙為亮
攝影：陳陶鈞

記：記者
城：張如城

記：你的新歌《友誼的光彩》創作了四年，點解？
城：當時要一邊讀書一邊創作，作吓又停吓，一有靈感又再作，大大話話改咗50多次，現在的版本我都好滿意。
記：其實首歌想表達啲咩？
城：我最想透過這首歌寫出自己對中國奧運的期待，我覺得奧運係百年難得一見的盛事，作為中國人一定要全力支持！
記：成首歌中，你自己最鍾意邊句？
城：Together，together，together，因為體現咗中國人對奧運嗰份萬眾一心嘅團結。
記：你在音樂節目上演出，那些舞步是你編的嗎？
城：係，這首歌和我之前的《愛意》同《真愛是真》感覺唔一樣，前者為中慢板，這首是dancemusic，所以我為歌曲加入舞蹈元素，最鍾意「唱出人民熱潮湧，你對我我對你高歌」因為可以配合自己360度轉身的台風。
記：有聽過網上惡搞版的《有耳的棺材》嗎？
城：有聽，我睇到都忍唔住笑，多謝各位朋友咁有心機。
記：網民惡搞你的作品，又笑你騎呢，你不嬲？
城：我認為批評一定有，但亦一定有人支持我，否則唔會有𠵱家嘅張如城，我亦唔會出到第三首歌。（EQ真高！）

試吓寫情歌

記：除咗宣傳新歌，近排還有咩新搞作？
城：上星期我被邀請上了湛江公安局慶祝奧運圓滿結束的晚會，氣氛十分好，很多公安哥哥姊姊也支持我，在台下高呼張如城，十分開心。此外，會再有一首新歌推出。
記：可以透露一下新歌講啲咩？
城：首歌叫《東方的少年》，主旨係勉勵年輕人不要自殺，堅強地茁壯成長。（因為城城暫時不想公開全部歌詞，小記只能筆摘幾句與大家分享：「wonderful！wonderful！wonderful！東方的少年，你在天涯海角，來吧，啦啦啦！」看來城城極愛用三個重複英文字開頭呢。）
記：你有沒有想過自己的歌手定位？
城：我想做一個創作歌手，其他的我沒有多想……遲啲會試吓寫情歌，（點樣嘅情歌？）應該會像熱情的沙漠一樣，散發愛情的澎湃。
記：寫情歌，你有拍拖？
城：……都……（此時，身旁的張太立刻喝止：「音樂以外其他嘢，我哋都唔會回應！」──城城有無拍拖，我想大家同我一樣八卦想知，但我已經盡力了！八唔到，對不起！）

媽咪真的愛妳

記：你有無聽啲hit歌？例如Eason、謝安琪？
城：自己好少聽流行曲，流行曲歌詞太生活化，欠缺意境。舊歌可以令我心靈上有反思，我大多數創作概念也來自舊歌。我鍾意《壯志驕陽》同《紅日》，同我首《友誼的光彩》一樣，表達一種奔向明天，熱愛生命的情操，充滿正能量。
記：咁你有邊個女歌手，好想合作呢？
城：汪阿姐，好想同佢合唱《勇敢的中國人》。
記：你一直都是獨立創作，有想過夾band嗎？
城：自己都有心思思，但暫時未搵到合適對象，如果真係夾band最想好似Beyond咁。
記：你最鍾意Beyond邊一首歌？
城：首首都鍾意，如果一定要揀會係《真的愛妳》，借住呢個機會好想多謝媽咪，成日跟出跟入，之前去大陸登台，佢都有陪我為我打點一切。
記：你有無打算發展海外市場呢？
城：當然有，我嘅目標係衝出亞洲，將我嘅音樂響遍世界各地，其實幾年前加州大學曾經請我去做show，不過當時因為差不多考試，惟有推咗，我相信美國也有支持我的朋友。

京奧潮童上身

記：平時除了上堂，作歌外，仲會做乜？
城：我都會上網玩onlinegame，打PSP三國無雙，星期日會同同學一齊打羽毛球。
記：咁你有玩Facebook嗎？
城：無，唔識玩，我反而會上網聽外國歌，好似AvrilLavigne，J-pop都會留意，但我最鍾意都係睇周星馳嘅VCD。
記：最鍾意星爺邊部戲？
城：一定係睇過好多次都一樣咁鍾意嘅《唐伯虎點秋香》，尤其燒雞翼嗰part，真係好搞笑，燒雞翼，我鍾意食，但係你老母……（此時又被張媽媽打斷……）
講真，比起01年初出道時的張如城，眼前的他彷彿潮童上身：頭戴葛民輝主理的4A貨車帽，迷彩背心牛仔褲配超誇褲飾加紅色波鞋，就差那件紅色京奧tee便型味十足。其實城城同一般廿零歲年輕人無異，只是表演風格較為富有個人特色吧！大家還記得剛出道的謝霆鋒掟結他遭狂插，陳冠希和麥浚龍一樣試過被人網上惡搞，話唔定，下一個潮男icon係城城呢？Whoknows……