南韓喺國際球壇冚旗近兩年後，上周六太極旗再次迎風飄揚，升旗手係法甲球隊摩納哥嘅10號仔朴主永，佢首度上陣就入波兼助攻，助球隊主場擊敗羅連安特，為南韓足球爭番口氣！
一傳一射助摩納哥贏波
身價300萬美元（約2,300萬港元）嘅朴主永，25分鐘接應中場直傳，右大腿控定皮球後，推至大禁區前冷靜射地波入網；70分鐘，朴主永掉轉角色，中場攞波一個致命直線，助攻隊友利文尼入波。英文足球網站《Goal》好多球迷留言，中國同日本球迷都話朴主永肯定成大器；現場觀戰嘅法國網友ED就話：「佢走位聰明，踢法又唔自私，好似喺歐洲打滾咗好多年咁，遲早會成為法甲最出色嘅球星！」
唔踢波可以做阿Sir
不過，朴主永唔踢波可以做阿Sir，佢夏天獲高麗大學取錄，即將修讀體育教育碩士課程。
其實呢場波唔單止朴主永成功，亦為南韓足球打一支強心針。南韓02世盃後飛黃騰達，不過06世盃就分組賽出局，07亞洲盃4強出局後揭發李雲在等人賽前買醉後，足運墮入低谷。連最近嘅世盃外10強賽，南韓球迷亦對國家隊漠不關心。
目前，歐洲球壇嘅南韓球星亦「條條fing」，朴智星喺曼聯苦無出頭天，李榮杓就兜咗去多蒙特，只有薛琦鉉喺富咸算企得穩。如今朴主永乘勢而起，分分鐘成為國家新英雄，拯救南韓足運！