最年輕議員陳克勤一「乳」成名，名滿香港，真係一波未平，一波又起，民建聯另一新星又告出事。九西票后李慧琼噚日接受香港電台訪問，講述當選感受，佢話今次上位，最多謝「師傅」曾鈺成畀機會佢，又讀出給媽媽的信，表示阿媽對佢從政一直不以為然，九年前初次參選已經唔多鍾意，今年參選立法會更加擔心，但都支持佢，又幫佢照顧女兒，所以當選要多謝阿媽。
點播「匈牙利自殺歌」
講呢啲感性嘢，應該好穩陣，可惜最終都係出事，李慧琼點咗首歌，仲要係一首禁歌，辣㷫唔少聽眾。李慧琼點播嘅歌，相信好多人聽過，就係經典名曲《GloomySunday》（憂鬱的星期天），由匈牙利作曲家RezsoSeress寫於上世紀30年代，調子十分哀怨，據講唔少人聽完後感到絕望而自殺，故有「匈牙利自殺歌」之名，英國BBC等國際知名電台更一度禁播呢首歌，免得有人聽完做儍事。
聽禁歌而自殺係咪真有其事眾說紛紜，至今未有明證，有人指可能係唱片公司促銷噱頭，近年呢首歌因電影《布達佩斯之戀》重新流行，上述自殺傳說再次翻炒。噚日有聽眾聽到李慧琼點呢首歌頓時火都嚟埋，質疑佢唔識嘢，世上好歌千千萬萬，偏偏點中一首自殺禁歌！
政治智慧高下立見
李慧琼解釋揀呢首歌，係因為鍾意旋律，話希望大家聽完首歌後，可以將過去一星期唔開心嘅事，轉化成正面能量迎接新一個星期。部份聽眾對李慧琼心水歌反應過敏，八方冇意見，但佢如此憑歌寄意，都真係頗為刁鑽。同時接受訪問嘅陳淑莊點歌大路兼穩陣，歌神許冠傑首《浪子心聲》香港人人啱聽。政治人引經據典好考功夫，點歌都有大學問，呢個回合，高下立見。
政壇中人憑歌寄意中外有唔少例子，近年香港最令人印象深刻嘅，應該係前財爺梁錦松引用羅文《獅子山下》歌詞，勾起香港人集體回憶，較假大空式口號動聽得多。選前民建聯對李慧琼、陳克勤兩位新星充滿期望，點知兩人甫當選就出師不利，似乎都係冇乜觀眾緣，有人更喺facebook發起「10萬人討厭民建聯」group，參與者極速增加，倒民建聯浪潮湧至，八方祝佢哋好運。
mailto:[email protected]