無綫日前向吳啓華發律師信，阻止他繼續拍攝鄧特希監製的亞視劇集《法網群英》，昨日吳啓華在科學園如常開工時說：「律師信我未收到，可能我改咗地址，所以收唔到，所有嘢我都係喺報紙上得知，𠵱家我份無綫合約喺北京，睇唔到，律師信又收唔到，所以冇嘢可以做，不過我記憶中我同無綫份約係到今年6月。」
吳啓華說：「我唔希望關係搞得唔好，但如果要嬲都冇辦法，如果套劇收視唔太犀利就冇乜嘅，但控制唔到。」蔡少芬早前接拍的《勝者為王》也會在亞視播出，吳啓華說：「好多人係咁，睇TVB做唔做嘢，其實無綫唔使驚，咁大實力，求其拍《溏心》三、四、五輯，我哋都趴喺度，不過唔可以怪佢。我都四、五十歲，做多兩、三年都收皮，都係想積多啲儲備。」
採訪、攝影：楊潔雯