馮仁昭四圍超：
吳啓華偷雞拍劇收無綫律師信 - 馮仁昭

吳啓華當年憑演無綫劇集《妙手仁心》裏面嘅程至美醫生而一洗多年頹風，成功上位，但自從年前佢被踢爆媾女有損形象後，在港聲勢大不如前，本來仲以為佢同內地姑娘石洋子結婚之後，是是非非都可以平息，但諗唔到佢喺今年底榮升人父前，竟然要收無綫律師信，可能要同無綫對簿公堂㖭。

走法律罅

啓華近排幫亞視拍攝劇集《法網群英》，呢套劇嘅監製係無綫前金牌監製鄧特希，據知啓華接演呢套劇亦係由鄧特希穿針引線，而啓華一直同無綫有約在身，佢就走法律罅，先簽約鄧特希工作室，再由鄧特希同亞視簽約合作開拍《法》劇。
雖然過往有唔少藝員都用同一條橋偷雞拍劇，但係今次啓華就俾無綫追究到底。馮仁昭聽聞啓華拍攝《法》劇後，無綫曾經兩度發律師信畀佢，聲言佢毀約，要以法律途徑追究，但由於啓華一直冇回覆無綫，所以無綫收集晒啓華拍呢套劇嘅資料同證據，準備同佢反枱開戰。

一定追究

無綫製作資源部總監樂易玲，噚日被問到係咪發律師信追究吳啓華毀約，所以會以法律行動追究時，佢未有否認，只係話：「個別事件唔回應，不過TVB一路以嚟好尊重合約精神，任何有違合約嘅情況，TVB一定會追究。」但亞視高層陳灌明同監製鄧特希，噚晚就聲稱對呢件事全不知情。