多倫多電影節進入尾聲，噚日韓國男星李秉憲同鄭雨盛去到當地出席佢哋套新片《好傢伙，壞傢伙，怪傢伙》嘅首映，同行仲有導演金知雲。齣戲喺韓國入場人次已經衝破700萬大關，而多倫多嘅fans亦唔少，紅地毯上有唔少韓裔女fans喺度舉牌撐場，鄭雨盛仲好親民咁同佢哋合照同簽名，幾乎來者不拒。
同日由布斯達拉斯侯活（BryceDallasHoward）主演嘅文藝片《TheLossofaTeardropDiamond》亦舉行首映，擔任男主角嘅《神奇4俠》（FantasticFour）「霹靂火」基斯伊雲斯（ChrisEvans）都有到場。27歲嘅布斯自去年生完仔做咗人阿媽後，𠵱家仍未收到身，比起佢拍《蜘蛛俠3》（Spider─Man3）時肥足兩個碼，仲現出雙下巴，拍埋同齡嘅基斯嗰度十足佢家姐。