又到中秋節，約埋屋企人去酒樓食飯團圓，好多人會買支紅酒飲吓。男友話唔好成日飲法國紅酒，諗住試吓冷門啲嘅意大利酒，品酒專家劉致新啱啱出咗本《意大利葡萄酒08》書，都介紹得幾詳細。小妹冇乜耐性慢慢睇，即刻打電話問劉Sir有乜好介紹。
劉Sir話，意大利有好靚葡萄酒，價錢仲平過法國一大截，但喺香港算係冷門，所以寫咗本意大利葡萄酒嘅書，「以一支頂級新酒咁計，法國酒賣兩、三萬蚊，同一級數意大利酒賣兩、三千蚊」。佢話，意大利有過百種葡萄品種，全國都有生產葡萄酒，有兩個省分最出名，一個係意大利西北部皮埃蒙特省（Piemonte）嘅紅酒，果味濃郁，當中Barbaresco（巴巴列斯科）為意大利最佳紅酒之一，豐厚雅致，典雅而細膩；托斯卡納省（Toscana）嘅紅酒風格輕柔啲，充滿花香。
又紅酒又汽水大忌
劉Sir又話，意大利葡萄酒都好啱配中菜，好似食燒乳豬，可以揀單寧較濃嘅紅酒如新年份酒，或南方嘅Primitivo、Nerod'Avola等；燒鵝、燒鴨可配典雅紅酒如Barbaresco或Chardonnay。脆皮炸子雞最好飲Franciacorta汽酒。白灼蝦應配白酒，GrecodiTufo或PinotGrigio最合適。
佢提醒小妹，去酒樓一枱食飯，又紅酒又汽水係大忌，因為飲完汽水後再飲葡萄酒，口感變得又酸又澀，浪費大好美酒。
電郵：mailto:[email protected]
逢周六、周日刊出