自由黨慘敗，正一親者痛仇者快，好多人擔心立法會少咗工商界聲音，對香港有弊冇利。行會成員范鴻齡卻唔係咁睇，噚日佢話香港商界，唔止自由黨一把聲音，仲有好多商界人士發聲，大家唔使咁悲觀。
范鴻齡係中信泰富大班，又被視為可晉身未來特區管治班子黑馬，自由黨沒落，少咗對手，佢梗係唔擔心啦。富貴黨前景堪虞，隨住田少同周梁失守新東、新西，區內多個地區辦事處亦要摺埋，下月約滿會陸續拉閘，同時遣散約八至十個職員，至於地區支部係咪保留則未有定論。有自由黨黨員話，如果兩大巨頭去意堅決，暫時睇唔到其他高層有意落區，相信地區支部都唔會維持落去。
劉健儀赴美探親
選舉前自由黨有意聘用更多職員，負責政策研究同支持地區服務，𠵱家形勢驟變，黨內相信會叫停，一切按兵不動，待高層人事變動塵埃落定再作打算。八方知道自由黨今個月23號舉行周年大會，目前已知議程，未有檢討選舉或推選新主席項目，據知代理主席劉健儀日內到美國探親，黨內有人笑言要過一段群龍無首日子。