正當大家期待鬧「民建聯最無恥」鬧到街知巷聞嘅毓民，10月殺入立法會後，會唔會同好可能成為立法會主席嘅民建聯曾鈺成炒大鑊之際，噚日竟有人目擊兩人中午撐枱腳。八方問毓民係咪真有其事，佢證實噚日的確喺中環交易廣場洞庭樓同曾鈺成食晏，由對方主動邀約。
毓民強調，呢個飯局光明正大，兩個人坐喺大堂，唔係匿埋間房鬼鬼祟祟，雙方主要傾吓選後大勢。至於曾鈺成可能想做立法會主席，係咪向毓民拉票呢？毓民聲言曾鈺成冇講過呢樣嘢，「佢點會拉我票吖，我一定投反對票㗎啦！」毓民喺九西搞掂公民黨毛孟靜，又幫民建聯清理門戶鬧殘鍾港武，曾鈺成係咪應該請食飯先！