內地多份報章噚日報道，跳水皇后郭晶晶疑因視網膜破損，需要來港做手術，開晒名話由名醫林順潮主診。官方新華網都有引述呢項消息，但跳水隊領隊周繼紅，就指報道係「無稽之談」。
郭晶晶隨中國金牌精英訪港時，俾汪阿姐問到結婚傳聞時，已否認計劃移民來港，亦冇承認有結婚意向。但圍繞佢嫁嚟香港嘅傳聞依然沸騰，先係《壹週刊》日前報道27歲嘅郭晶晶獲霍啓剛安排來港修補視網膜。
跳水皇后前日去四川成都訪問，噚日嘅《成都晚報》同一大堆內地報章，就大字標題翻炒《壹週刊》有關報道，好笑在新華網都炒埋一份，不過就冇搵到周繼紅回應。周領隊叫記者「好端端，不要無事生端。」佢話郭晶晶01年做過視網膜手術，眼疾翻發卻係無稽之談。