由電台DJ、保險從業員、再成為飲食節目主持、食評人以及食家，蘇施黃（阿蘇）這30年來從事過不同行業，也曾被病魔纏繞，經歷雖多，然而阿蘇深信主會為她鋪橋搭路，在人生的起跌中能扶她一把。現年53歲的阿蘇，繼續積極發展事業，更投資在自己身上，以其嘜頭為主的無綫新節目《蘇Good》，將為她帶來「錢搵錢」的機會。 撰文：懷鈺
波折篇
事業停滯 做廚謀出路
有很多人問過蘇施黃，「究竟你係咪真係識得煮嘢食？」阿蘇得意洋洋地說：「我梗係識啦，就好似煮畀自己食咁啫！」阿蘇自大學時代開始，已經煮飯給同學品嚐，「當年，每日都有10個8個同學嚟開餐，我一煮就煮足幾年。」阿蘇謂。話雖如此，她的舊同學看了她主持的煮食節目後，竟然質疑她的烹飪技術，有人更直言：「你係咪得㗎？你以前煮嘢咁難食！」
睇書啓悟人生
阿蘇也坦言自己昔日的廚藝，只是比付錢出外食的好一點點，不是很好吃，卻又不能說難入口。那為何阿蘇現時煮得一手好菜呢？
一切從97年開始。
當時，阿蘇的保險事業發展停滯不前，經濟甚至一度陷入困境。她說：「唔係講笑，諗番都幾辛苦，我當時冇晒direction（方向感），又冇錢，足足攤喺張床度攤咗兩個月，唔知做乜！有本書我日日都會睇，叫《荒漠甘泉》，其中一篇講『休止符』，佢話好嘅樂章一定會有停頓，人生入面你想奏出美好嘅樂章都要停落嚟，先可以再向前。有一日，我靈機一觸，諗到不如幫人煮嘢食，於是就揸車落跑馬地，買餸買鑊，之後打畀朋友話我開始去人屋企煮嘢，每位收250蚊，咁10個人就2500蚊啦！」
阿蘇這樣到別人家中作客席廚師，一做便做了一年多，生計得以維持，無奈這份工作並未為她賺來很多金錢。每次煮食，她只能賺得千元利潤：「你諗吓，我要買幾轉餸，早上買菜，之後返屋企洗菜，下午去買魚、海鮮，因為要新鮮，有時仲要前一晚兩晚準備定啲海味，煲定湯咁。當時辛苦到做完都坐唔到，條腰骨好痛，因為企得太耐。」
阿蘇因事業跌入低潮而篤信基督教，往後發生的一切，她都衷心感謝主的安排。由她的身體免疫系統開始出現問題，引發起甲狀腺有問題、患上類風濕關節炎，直至05年，她說：「我份人除做嘢外，乜嘢都好求其，我從來未去過驗身，有日陳潔靈問我有冇驗身，唉，我咪同佢講去撒哈拉前驗過囉，又問我有冇驗吓女人嘢，為咗呢啲嘢我哋差啲嗌交咁滯！就係全靠佢咁insist（堅持），咁咪去驗囉，一驗就驗到嘢，而嗰樣嘢係細到lessthan1cm，而醫生話嗰樣嘢出現lessthan半年，好彩就咁割咗就冇事。直到𠵱家替TVB製作節目，我都覺得係主鋪條路我行。」
治乳癌花30萬
為醫治乳癌，要住院五天來做切割腫瘤手術，阿蘇花掉了30多萬的醫藥費，經此一役，她學懂了計劃將來，阿蘇說：「我一向遊戲人生，夠食、夠着，得閒去玩吓便很滿足。但生病後，真係『口』停口停呀，只係得電台一份工，其他專欄呀、CabelTV都停晒，我個如意算盤立即打唔響，真的要savingfortherainydays（未雨綢繆）！」從不相信「投機」的阿蘇，只願意投資到自己身上，她說：「自己就係asset（資產），要用錢搵錢，做CableTV之後搵到嘅錢，就用嚟再做TVB搵更多嘅錢，令自己安定啲。」
投資篇
進軍網絡 微軟邀合作
將於本月22日開始，於無綫一播便播60集的全新飲食節目《蘇Good》是阿蘇的最新project，阿蘇破格請來林以諾牧師為節目主持開鏡儀式，她說：「通常啲節目一班人做，呢個節目我一個人做嘛，所以咪跟我嘅信仰去開鏡囉，之後好多人SMS我，當中有個比較奇怪嘅，就係鄭秀文，actually我唔識佢，佢又唔識我，但佢話佢好開心我咁做。」
煮食片段互動
《蘇Good》是無綫破天荒與外判製作公司的合作，對於有傳阿蘇以1,000萬酬金接拍，她一笑置之的說：「巨額酬金？！連掃地、晾衫，幾十人加埋可能先有咁嘅錢！」阿蘇透露是次project，乃第一位找她做煮食節目的製作人蕭潮順與她共同製作的，並由蕭潮順出面與無綫高層何麗全洽談，故她自言不知道與無綫合作的細節。
雖說做人要未雨綢繆，阿蘇卻只會在每年的下半年計劃未來一年的發展，她說：「年尾仲有啲代言、廣告要做，咁仲要renewcontract呢！哈哈！之後又會開始拓展我嘅網站07807.com（取其國語諧音：能吃不能吃）。」自言是電腦白癡的阿蘇續說：「呢個網好似YouTube咁，等人可以拍咗啲煮嘢嘅片放上去，我亦會自己拍啲片放上去，此乃電視同電台都做唔到嘅即時互動。」
阿蘇的網站早前接到微軟的邀請，成為他們在香港的七個合作夥伴之一，這個網上飲食平台可否成為一種氣候？《蘇Good》又能否讓阿蘇的「錢搵錢」計劃延續下去？真的希望主耶穌能繼續為阿蘇鋪橋搭路。
部份圖片：《飲食男女》、《Face》
有個性：率直敢言變嘜頭
蘇施黃工作認真兼「有態度」、率直敢言，曾在電台節目中談及香港人的英語水平時，忽然舉出容祖兒的歌曲《我的驕傲》中「I'mproudtoflyuphigh」的錯誤英語發音，狂踩祖兒的英語令人嘔血兼火滾。她又在電台節目中，要聽眾接通後以英文名作介紹，但如果聽眾的發音不準，如Alan讀成「Air倫」，即被阿蘇拒入線及狂鬧。
此外，阿蘇主持電視飲食節目時，最憎他人以「口感」來形容食物的味道，更曾經鬧喊一名訪問她的記者，指她沒有準備便來訪問她。不過就是這種有態度成為阿蘇的風格，更以此延續至飲食節目中，批評餐廳絕不畀面，反而令觀眾極有共鳴。
人物誌
藝名：蘇施黃
原名：劉高琮
出生日期：1955年2月17日
簡歷：
78年 由聖士提反女子中學同學俞琤介紹加入商業電台任DJ
82年 於私人機構擔任市場推廣經理，周末於商台主持節目。
87年 轉職保險業任保險顧問
99年 重返商台主持節目
05年 於有線電視主持煮食節目10月發現患有乳癌，施手術割除及休養兩星期後即復工開咪
08年 離開商台，主持無綫飲食節目
資料來源：《蘋果》資料室
