本欄讀者來自不同階層，從收到嘅讀者來函之中，就知道讀者有商人廠家、專業人士、大學生、研究生、家庭主婦、退休長者、基層工人等等。啱啱收到一封讀者來函：
「左丁山先生：你好！請把下列事實寫出來，讓我舒一口屈氣。我由另一區搬到本區居住，事緣我的一隻牙齒被蛀蝕，需要修補，於是捨棄過往的牙醫，就在住所附近的牙醫診所就診，因我是首次來，需要登記及約定翌日就診。
約定時間，坐在牙醫椅上，說明來意，經牙醫一輪觀察，三扒兩撥，就快速把蛀牙修好了，出來找數，原來要四百五十元，我大吃一驚，心想，怎麼這樣貴，根據過往經驗，補牙不需二百元，我放下三百元，往街外隔鄰的銀行㩒機補數算了。事後我有三點意見。
（一）為甚麼間間牙醫診所都不把收費表詳列出來，讓顧客有個預算。
（二）顧客坐在牙醫椅上，全程擘大口，冇機會發問價錢若干，牙醫為甚麼不通知一聲。
（三）牙醫教我約一分鐘的護理牙齒方法，這種「知識產權」，約值三百元，我在讀小學上「衞生」課本時，早已知悉，我認為只值三十元。
一個貧窮的牙病患者敬上。」
睇完呢封信，就或者可以明白，點解今年立法會選舉中，激進派抬頭。基層市民覺得佢哋畀人恰，求助無門於是索性投票畀蛇宴派或者激進派也。一啲專業人士收費，唔好以為打開門做生意，自己玩晒，須知古人有言：明買明賣！你收一千蚊補一隻牙都可以，但首先要將價錢以大大隻字張貼在門口至得。太多人做事往往從自己立場出發，圖自己方便，全不想及方便顧客userfriendly呢回事。有時真係好佩服肥佬黎，呢位大資本家二十幾年前已經將userfriendly擺在口中，唸唸有詞，從用家立場諗問題及解決方案，佢後來辦雜誌、報紙亦如此，唔怪得咁多人願意畀錢佢賺。