聽日就35歲生日嘅陳慧琳（Kelly），下個月2號就會同拍拖多年嘅男友劉建浩（Alex）拉埋天窗。
雖然聽日係Kelly最後一次過單身生日，但佢都冇特登請假大事慶祝，反而準備喺工作中度過，好似今日咁，Kelly會去廣州出席一個中秋晚會，而聽日就會返香港做二手衫慈善義賣，忙個不亦樂乎。
噚日下晝兩點，着住熱褲仔襯短靴嘅Kelly，離開加多利山寓所之後，就去到尖沙嘴新港中心嘅「陳慧琳二手衫慈善義賣」埸地打點，Kelly除咗整理一吓啲二手衫之外，亦有接受電視台訪問，宣傳今次活動。
籌款助學童
慈善義賣埸地外面全部密封，只係不時見到工作人員攞住一個個紅白藍袋出出入入，馮仁昭隱約見到舖頭裏面擺放咗大堆衫同衣架，情況都幾混亂。Kelly今次搞嘅二手衫義賣喺聽日開始至下個月5號為止，所有收益會撥捐陳慧琳兒童助學基金。
