許晉亨和李嘉欣恩愛蜜運，閒來旅行玩樂，對比前夫的逍遙，何超瓊（Pansy）前晚卻為身家暴跌七成，大呼生意難做。不過，Pansy忙裏偷閒，笑言要向前夫借種生仔，更着記者致電李嘉欣。
法國護膚品LaMer前晚在九龍WHotel舉行「cool&breezy」酒會，出席的包括何超瓊、方中信、陳冠希clot拍檔潘世亨、郭志怡、鄭詩韻和名模楊崢等。
「人老係自然嘅事」
近期市況差，上月生日的何超瓊都說生日願望是維持現狀。她說：「𠵱家生意難做，希望樣樣穩穩定定啦。雖然自己好努力，好有魄力，但經濟差咗。」問她可是賺少了錢？她說：「唔係，我身家都縮咗七成，啲股票由十二蚊，跌到𠵱家三個幾，不過，我都好有信心可以賺番。」問可是想做香港女首富？她說：「我做嘢係為滿足感，錢唔係我指標。」她又謂無意從政。
Pansy曾靚絕ball場，前晚見她皮膚欠佳，打扮隨意，她淡然說：「人老係自然嘅事，我怕死，唔敢試botox。」Pansy年過40，又沒拍拖，問她可會借種生仔？她說：「問邊個借喎？好大問題㗎，精子庫又唔知係邊個，萬一生個BB好惡點算？」何不向前夫許晉亨借種？她聞言失笑說：「咁新鮮嘅事都畀你哋諗到，我都可以諗吓喎！」
記者笑Pansy要先問准李嘉欣，她即笑說：「你哋𠵱家打畀佢啦。」李嘉欣之前指許晉亨的舊情戀事是上世紀新聞，她都聰明自嘲說：「咁咪要等到下世紀？」
方中信請錯菲傭
此外，方中信為家中兩菲傭向記者大吐苦水，他說：「佢哋好似阿笨與阿占，乜都唔識，鎖門、開洗衣機都要教，返嚟一個月，教足一個月，𠵱家好少食一餐正常飯，一係我煮，一係太太煮。」老婆莫可欣豈非大發脾氣？他說：「我最𤷪𤺧，每日就見到老婆重複鬧人，又重複教同一樣嘢。」
採訪、攝影：RitaLeung
