小弟同畢傑都係二十尾三十頭嘅中生代，相信同好多香港差唔多年紀嘅球迷一樣，睇星爺電影大。周六迎月夜，我就推介紐卡素W，大叫「今晚打老虎」！
呢排仲叫人捧紐卡素，有冇搞錯？冇錯呢排紐卡素立立亂，領隊基瑾同老闆艾殊利炒嘢，一年唔夠又唔do，𠵱家由看守領隊侯頓領軍；而且傷兵名單水蛇春咁長，杜夫、馬田斯、維度卡等等都唔出得，好在佢哋一眾英格蘭兵都冇份打世界盃外圍賽。
奧雲要入波爭表現
阿倫史密夫、祖爾巴頓、史堤芬泰萊冇份就預咗，奧雲仔都叫聯賽入過波，都爭唔贏廸科爾同希斯基；睇番英格蘭兩場外圍賽入6球，呢兩位仁兄都冇波入，奧雲點都希望趁聯賽開番，入番幾球波，唔係點博卡比路青睞，做到朗尼嘅前線拍檔。
睇番或者會受國際賽後遺症影響嘅球員，紐卡素都有基雲、高洛仙尼、約拿斯古廸利斯等，後兩者更要來回歐洲及南美洲；不過好在紐卡素對「升班馬」有一手，上季主場對「升班馬」取得2勝1和，今季首場主場聯賽都可以打低保頓。相反外號「老虎」嘅侯城係小弟心目中降班大熱，上季升班都係靠曼聯借將費沙甘保，冇咗呢位小國腳即刻死晒火；而且連防守亦唔見得好，上仗輸5粒畀韋根，後防失誤多到嚇死人，今次作客紐卡素嘅聖占士公園球場，都應該冇運行。
兩場西甲和波好路
周日中秋節，相信大家都一家大細食飯賞月，冇時間賭波，既然係咁就買定早飛。西甲搵咗兩場和波做配腳，拉科魯尼亞上仗打低皇馬，過程充滿說服力，今次作客維拉利爾，主隊中堅高甸要停賽，後防不穩；馬拉加主場對畢爾包，亦都係五五波，串埋和波冇錯。文：牽牛
〈早飛倉〉
主菜：星期六30紐卡素勝(1.6)@600
混水摸魚過關：星期六30紐卡素勝[-1](2.9)x星期日27馬拉加和(3.1)x星期日30維拉利爾和(3.3)3x4@100
今日早餐價錢：-$1,000
上日賺蝕：-$1,200
早飛倉投注後結餘：$98,315
規則：$100,000本錢，每日買早餐最多動用$5,000，最少$1,000，逢周二、五起身食早餐（見報）。
周末早飛超級重心
星期六32：西布朗（上）
「升班馬」西布朗未開齋，不過上場作客迫和保頓，已經有改善；今仗對住有領隊古比士利辭職、兼作客差到震嘅韋斯咸，正好係開齋良機。
星期六74：華拉度列（下）
華拉度列上季主場對住皇馬及巴塞全部有分落袋；馬體會首仗大勝無疑甚勁，但有科蘭、阿古路喺世界盃外圍賽打到殘，兼有歐聯後顧。
星期日25：錫耶納勝
錫耶納首仗作客不敵阿特蘭大兼有前鋒馬卡朗尼領紅牌，好在仲有費克識入波；卡利亞里實力更差，兼有廸亞高盧比斯停賽。
難啃早餐
星期六33：韋根贏唔到
韋根上仗無故大勝贈侯城5蛋，不過希斯基、路爾斯華倫西亞都要打足兩場世界盃外圍賽；新特蘭有能力作客贏熱刺，對韋根搶到分。