XB360全球強勢，唯獨日本久攻不下，好彩拉到SE同Namco幫手出RPG，一隻《TOV》令主機喺日本終嚐斷貨滋味，緊接係SE首款RPG《InfiniteUndiscovery》（無盡探索），呢款被視為《FFXIII》嘅止渴劑，以22位主角及12人出戰做賣點，係咪人多真係好辦事？
文：之達
攝影：梁細權
美式RPG地圖勁大
雖《無》打正SquareEnix牌頭出戰，但開發是由Tri-Ace操刀，所以唔好祈望遊戲有半點《FF》影子。日版水貨剛到港，叫價五嚿幾水，若一擲千金買番嚟先知唔對路，咁就喊都無謂；建議等月尾行貨，$299兼有英文介面，起碼對戰鬥系統同古仔都易明啲。
講開英文介面，《無》同早前《TOV》可謂兩碼子事；《TOV》算係久違咗嘅純日式RPG大作，我玩起上嚟啲「㗎血Feel」返晒嚟。反觀《無》徹頭徹尾係一隻無Online嘅MMORPG，人物、場景西洋化，地圖一望無際，團隊式喺地圖打怪獸，正係鬼佬機迷最愛玩法，唔似《TOV》、《FFXII》咁可以轉人玩法術，落柯打叫條𡃁做嘢，更遑論設定Priority幾時補MP；所以就算《無》以3Team12人玩圍攻，感覺上都係潮洲音樂——自己顧自己咁。好明顯今勻SE隻眼係望緊鬼佬個荷包，拜託唔好將嚟緊嘅《StarOcean4》同《FFXIII》都搞成咁！
主角吹奏成關鍵
坦白講，《無》只係對唔正我呢類日迷口味，始終戰鬥毋須Load碟已抵讚！事實遊戲已加入好多MMORPG都無嘅元素，如解謎和小遊戲等，故事亦較龐大，分支不多，但要搵齊解晒都有難度，尤其主角專用技能吹簫，Sorry，見佢打橫吹以為係簫，查實鬼佬統稱為笛。魔笛一吹，有毒解毒，無毒強身，仲識得搵隱藏通道和寶箱，故事初段你會發覺無路行唔知點算，此時主角將劍變笛，一吹就出現新通道，繼續推進劇情！
遊戲類型：RPG
對應機種：XB360
遊玩人數：1人
推出日期：水貨日版已出/行貨英文版9月25日
售價：水貨約$530/行貨$299
開發商：SquareEnix/Tri-Ace
