每年一度的森小歌劇團於10月舉行，今次森美小儀不扮情侶，做回自己，演繹拍檔小孖俠，講述二人鬧翻拆夥。現實中森美、小儀工作仍然有影皆雙，二人雖曾作個人發展，但仍以拍檔工作為主。森美坦言，現在未是時候獨立發展，對方十分重要。平時扮「大男人」蝦小儀的森美這麼重情義，難怪當年被爆已為人父，小儀不惜為他講大話否認傳聞。
商台製作的《森美小儀歌劇團小孖俠》將於10月於九展連開五場，今次以卡通片造型為主題，他們在劇中飾演一對拍檔小孖俠，但因意見分歧而鬧交拆夥。現實生活中，森美和小儀拍檔約12年，由商台做DJ到主持無綫節目，大家合作早有默契。雖然早前二人開始以個人姿態接工作，但分開過後，還是覺得這個拍檔最好。
代推工作最激氣
日前森美、小儀接受訪問，森美直言不會拆夥，他說：「喺呢個階段，我覺得我哋係拆唔到夥，因為搵唔到最好嘅拍檔喇！保持𠵱家個關係最好，𠵱家一定要同小儀一齊，個人未係時候，發揮唔到力量。」不過小儀卻唱反調說：「𠵱家其實各自丟低緊對方，有時我哋都會自己接工作，我去拍戲，佢又去做司儀。」
人前人後森美經常戲弄小儀，其實二人感情深厚，他最難忘這個天天見面的「親密女人」，在他毫不知情下推掉工作，他說：「我經常鬧小儀啦！佢有次幫我推job，有個客同佢講，想搵我拍電器廣告，佢答人哋我已經接咗個電器廣告，但佢唔知我本身完咗約可以接呢個job，係咪俾佢激死吖！同埋佢會唔小心爆人哋嘅私隱，但佢唔知唔講得囉！」
為好友變大話精
小儀蝦碌多但情深義重，曾為森美擘大眼講大話，小儀說：「當日第一次傳佢有仔，我返公司，門口幾個記者捕住我，話我係佢最親密嘅女人，實知有冇仔。我當時冒住危險，對住燈火講話冇，猛話我唔知，一定冇。」
以往的森小歌劇，二人也會做情侶，去年嘴對嘴一幕更成為高潮，森美說：「錫都錫過、手又拖過，乜都做過，所以今年就試下做真實經歷過嘅嘢，令觀眾有同感，講番我哋嘅關係會得意啲，所以個劇都算係真人真事，但故事一開始就話我同小儀鬧交拆夥。」而今年的歌手嘉賓，則有張敬軒、鄭融和謝安琪，其中謝安琪更會飾演奸角挑撥離間。此劇眾DJ和主要演員會扮演不同的卡通人物，分別有小露寶、馬沙、小忌廉、小賓女和小甜甜等。
採訪：王連連 攝影：陳俊強
化妝、髮型：CoraTseofPerfectStage
場地提供：LoftStage