提起911，即想起大阿美利堅。但對譚小環來說，是獨家大日子──昨天剛好是小環跟老公蔡強榮（Eric）的結婚一周年，兩人已雙雙飛往泰國慶祝。問小環新婚這年來的生活大小事，幸福滿瀉話由老公搞掂晒，完全唔使佢煩。「好似佢鍾意叫我『BB』一樣，喺老公心目中，我就係佢嘅BB，永遠要照顧我。我懶、佢有主見，一凹一凸好相配。」
記者：林佩婷
攝影：陳陶鈞
服裝提供：littleblackdress（21473218）
當年
小環嘜頭文具
一問到雙方點識，「記得05年11月經理人Michelle開生日會第一次見，但對佢全無印象。」本來全沒交流的兩人卻在06年2月14日第二次食飯，這飯局原來是Eric一早預謀，目的想測試小環有無男友。「原來佢當日已留意咗我好耐！」
小時候，小環憧憬男友像小甜甜的狄里斯，「但Eric唔多似！」不過飯局後Eric展開追求攻勢，用三招冧掂小環。「佢知我鍾意食甜品，特登叫秘書幫佢報甜品班，學整畀我食。佢又將自己啲文具用品、水杯印晒我個樣，放喺公司用。最令我感動係佢上網搵晒有啲連我自己都唔記得嘅資料，但佢背誦如流。生日送99支花是必然，平日都會寫小卡片……」嘩，咁求婚實超驚喜浪漫？點知咩都無！「一拍拖都成日講結婚，有日喺屋企食飯，講講吓送紮花就決定結婚。」
派利是才覺為人婦
反高潮之二，是籌備婚禮零Argue！「我除咗拎個人出嚟試婚紗、同姊妹傾點玩新郎，其餘都由老公搞掂晒，結婚當晚我只係跟住個Rundown做。我個人無主見，老公最大優點就係咩都可以幫我揸晒主意。」一副小師奶模樣。「有人叫蔡太，直情唔知叫緊我！」直到半年後派利是，她才驚覺自己真正變了個師奶。
今日
平淡中見搞笑
所謂相見好同住難，生活上總有磨擦？小環諗了又諗，最後都話無吵過架。「婚後生活比以前一個人住好，家中大小事務有Eric包辦晒，只要我夜晚返屋企食飯，得閒煲吓湯畀佢飲，佢已經好滿足。」對紙婚的評語是「平淡中見搞笑」。「為咗保持私人空間，我哋各自有間私人房作緩衝。佢轉數快、又有幽默感，唔會直接話我。好似我嗰間房好亂，佢就會講笑話好似泰國翟道翟；唔會成日話我太瘦，只會不斷買多啲嘢畀我食。」
互造驚喜繫婚姻
有人話大家婚前婚後兩個樣，小環話浪漫驚喜當然沒從前多，但唔代表無，「佢時不時送花、生日99支花、小卡片等等依然Keep住做。我自己都有進步，有時趁佢出Trip就靜雞雞放卡片落行李箱，由佢自己搵。」夫妻相處之道，除發揚長處，也要改陋習。「可能四姐妹入面我最細，所以有啲小姐脾氣，做咗人老婆就收斂咗。」
將來
易話為家族
記得有人講過，兩個人結婚，背後其實連結兩大家族，唔小心掛萬漏一都幾頭痕。小環就話兩邊家族都好易話為。「好似過中秋節，無話一定要去男家先定女家先，邊日得閒易就就去邊度。」那繼後香燈的壓力呢？小環也搖搖頭話同小朋友無緣份。「Eric好鍾意小朋友，但我唔想，覺得玩就好，但好彩老公都無畀壓力我，順其自然。」