香港地要食新加坡菜，選擇不算多，數來數去都是叻沙，而且口味多已港式化。近日進駐尖沙嘴新港中心的「土司工坊」，主打星洲口味傳統土司，裝潢充滿六十年代南洋風味，坐低飲啖咖啡、嘆件土司，頓時以為自己變了南洋華僑。今日請來正宗坡妹Rosanne為你做美女食評，佢一試食，馬上話果然「10分」新加坡！
記者：王震遠
攝影：伍慶泉
Makeup：AlvinGoh
Hair：BillyChoi@HairCulture
Wardrobe：I.T.
Kopi星洲版「大牌檔」
每個地方都總有充滿特色的飲食文化標記，數香港代表必屬茶餐廳，而講到新加坡，相信會係KopiTian。Kopi即係馬拉話嘅咖啡，Tian即係福建話「店」咁解，呢種咖啡店，等於係星洲「大牌檔」。
幾十年前，中國人飄洋過海到南洋謀生，當時生活較刻苦，每日忙碌過後都會到「南洋咖啡室」嘆嘆咖啡閒聊一番。土司工坊正係想復刻出南洋咖啡室嗰種懷舊味道，潮流興集體回憶，就算係香港人都值得坐低慢慢享受、感受一下。
傳統土司$13
傳統土司是新加坡經典的早餐食品之一，兩塊土司夾着一層香濃咖椰一塊冰冷薄牛油，由椰漿和蛋混合成的咖椰味道甜，味道和口感極佳。
Rosanne：「牛油食得出好有新加坡味道，當你試過兩地味道就會食得出分別。咖椰都同新加坡味道一樣，平時屋企自己都有整開。如果以新加坡味道嚟評分，我畀10分！」
小魚椰漿飯$36
新加坡人一般的早餐，傳統用雞髀或魚做，現在以雞翼代替。椰漿飯是整碟的靈魂，飯粒帶有絲絲椰香非常特別。
Rosanne：「食椰漿飯最緊要椰漿味道新鮮，唔太油同唔腍。辣椒味啱香港人，不過唔啱我，我鍾意食辣，相似度都有9分。」
班蘭蛋糕$13
斑蘭蛋糕源自馬來西亞，帶有特別的植物香味，用來製蛋糕，口感很像茶樓吃到的馬拉糕，但帶有點點斑蘭葉香，口感鬆軟。
Rosanne：「跟番新加坡文化，應該用手食。好Soft，味道就爭少少，應該係多咗椰漿味道，香港人鍾意椰漿味，味道唔同但都好好味，我會畀6分。」
星洲叻沙$34
傳統叻沙不用筷子，只會用湯匙舀着來進食，所以麵線必需幼身，應先吃豆卜、魚餅和鮮蝦，再嘗嘗香濃的咖喱湯底，滿鼻椰香而味道鮮甜，跟泰國叻沙味道很不同。
Rosanne：「8分！香港食到嘅叻沙味道以呢度最似，湯夠滑濃味道啱啱好，已經好新加坡！」
Rosanne：feelslikehome!
原來Rosanne在新加坡早已見過土司工坊。皆因土司工坊是屬「FoodRepublic大食代」旗下的餐廳，在新加坡非常出名。Rosanne大讚土司工坊香港店的裝修跟新加坡店一模一樣，初初踏進店內，感覺已經非常興奮，感覺就好像回到家一樣，就連店內所用的杯和匙的形狀，都跟由細用到大的一樣，這些在香港是找不到的。原來店內很多擺設真的特別由新加坡找回來，真正充滿新加坡風味，難怪Rosanne見到會咁開心。除環境以外，食物都很重要，由Rosanne試味就最公道不過了，平時Rosanne在香港都會四圍試食新加坡餐館，一直想飲「美祿恐龍」都找不到，竟然在土司工坊飲得到，令她非常驚喜。Rosanne試過了幾款食物後，除了覺得辣味有點遷就了香港人口味而略減外，對其他食物都讚不絕口。如果想試新加坡風味，不用到新加坡，以後又多一個選擇。
土司工坊ToastBox（21111842）
尖沙嘴廣東道30號新港中心地下G18號鋪
